Azərbaycanda POS terminalların sayı kəskin azaldı – Ekspert səbəbləri açıqladı  

Azərbaycan Respublikası Mərkəzi Bankının son məlumatları ölkədə nağdsız ödəniş infrastrukturunda maraqlı bir tendensiyanı ortaya qoyub. Belə ki, 2025-ci ilin sonundan 2026-cı ilin aprel ayının sonuna qədər ölkədə POS terminalların sayı 184 220 ədəddən 160 225 ədədə qədər geriləyib. Cəmi bir neçə ay ərzində təxminən 24 min ədəd terminalın sıradan çıxması "Bu azalma kölgə iqtisadiyyatına və ya yenidən nağdlaşmaya təsir edə bilərmi?" sualını gündəmə gətirib.

Mövzu ilə bağlı Oxu24.com-a açıqlama verən iqtisadçı ekspert Eyyub Kərimli məsələnin görünməyən tərəflərinə işıq salıb. Ekspert bildirib ki, ilk baxışdan bu azalma nağdsız dövriyyəyə mənfi təsir göstərən bir amil kimi görünsə də, reallıq fərqlidir:

“İlk baxışdan bu POS terminalların azalması nağdsız dövriyyənin azalmasına təsir göstərə bilər kimi görünsə də araşdırmalar onu göstərir ki, bu azalma əsasən istifadəsiz POS terminallarla bağlıdır. Və ya bəzi hallarda texniki cəhətdən yeni tələblərə cavab verməyən POS terminalların yığışdırılması ilə əlaqədardır".

“Nağdsız dövriyyədə 8.7% artım var"

Eyyub Kərimli qeyd edib ki, terminalların sayının azalması ölkədə nağdsız hesablaşmaların zəifləməsi demək deyil. Cari ilin statistik göstəriciləri də bunu sübut edir:

“Çünki hazırda, 2026-cı ilin mövcud vəziyyətinə əsasən, nağdsız dövriyyədə 8.7% artım var. Bu da onu deməyə əsas verir ki, POS terminalların sayının azalmasına baxmayaraq, nağdsız dövriyyədə artım müşahidə olunmaqdadır".

Ekspertin sözlərinə görə, bu prosesdə fəaliyyətini dayandıran sahibkarların da rolu var, lakin əsas səbəb bankların strategiyası və ödəniş vərdişlərinin dəyişməsidir:

“Bu azalmada bəzi hallarda fəaliyyətini dayandıran sahibkarlıq subyektlərinin də müəyyən rolu mövcuddur. Lakin ümumi baxışda onu demək bizə əsas verir ki, bu gün nağdsız dövriyyənin azalmasına yox, daha çox POS terminalların istifadə olunmamasına səbəb həm də kartdan-karta vəsaitlərin köçürülməsidir".

İqtisadçı ekspert sonda onu da əlavə edib ki, banklar artıq resurslardan daha səmərəli istifadə etməyə çalışırlar:

“Onu da qeyd edək ki, bu azalma həm də bankların daha aktiv dövriyyə olan nöqtələrdə POS terminalları cəmləşdirməsi ilə bağlıdır".

Çimnaz Telmanqızı

Həmçinin oxuyun

SON DƏQİQƏ! Prezident yüksək vəzifəyə təyinat etdi

Azərbaycanda pensiya yaşı ilə bağlı mühüm AÇIQLAMA 

DİQQƏT! 3 saat işıq olmayacaq

SON DƏQİQƏ! Seyfəddin Rəhimov dünyasını dəyişib