Azərbaycanda qadınlar orduya çağırıla bilərmi? - Polkovniklə MÜZAKİRƏ  

Xarici media yazır ki, İsrail Müdafiə Qüvvələri  qadın döyüşçülərin sayını artırıb və bu say  2020-ci ildən etibarən iki dəfədən çox olub. Ümumilikdə, İsrail ordusunda qadın döyüşçülərin sayı  2025-ci ildə 8 min 500-ə çatdırılıb.  Hətta, qadın hərbçilər  hərbi əməliyyatlarda da iştirak edir. 

Niyə Azərbaycanda  qadınlar üçün ümumi hərbi mükəlləfiyyəti tətbiq edilmir? Niyə bizim qadın batalyonu, qadın döyüşçülərimiz  yoxdur?

Mövzu ilə bağlı Oxu24.com-un suallarını  Vətən müharibəsi iştirakçısı, ehtiyatda olan polkovnik-leytenant, hərbi-siyasi ekspert Elmar Hüseyn cavablandırıb.

Polkovnik bildirib ki, əslində bir çox ölkələrdə qadınlar üçün ümumi hərbi mükəlləfiyyət tətbiq edilib. Buna misal olaraq  İsrail, Norveç, Şimali Koreya, İsveç, Eritreya kimi ölkələrdə  qadınların hərbi xidməti məcburidir. Artıq bir çox ölkələr də  bu tətbiqi öz ordusunda  həyata keçirmək üçün məsləhətləşmələr aparır.

Həmçinin oxuyun

Azərbaycan əhalisinə mühüm XƏBƏR: Ölkədə bu qərarlar qəbul edildi

Yeni müavin təyin edildi  —  FOTO

Kəmaləddin Heydərovovun oğlu şikayət etdi: Məşhur biznesmen HƏBS EDİLDİ    — DETALLAR

Azərbaycanda təkrar ali təhsilə maraq artır: Psixologiya ixtisası niyə daha çox seçilir?  

"Təbii ki, Azərbaycanda belə bir tətbiq  gündəm mövzusu deyil. Yəni, qadınların hərbçi olmaq arzusu  ölkəmizdə  könüllülük prinsiplərinə  istinadən baş tuta bilər. Ürəyi hərbçi olmaq istəyən, vətən yolunda döyüşə atılan qadınlarımızın qarşısında heç bir maneə  yoxdur.

 Biz bunu 1990-cı ildən başlayan  Qarabağ müharibəsində gördük. Qadınlarımız vətən darda qalanda kişilərlə bərabər  döyüşlərdə  xüsusi qəhrəmanlıq göstərdiyinin də şahidi olduq. Şəhidliyə yüksələn, döyüşlərdə əlil olan   qadınlarları cəmiyyətimiz yaxşı tanıyır.  Döyüşçü ruhu  könüllü döyüşə atılan qadınlarımızın genetikasından irəli gəlir.Yəqin  ki, “Dədə Qorqud” filmində həyat yoldaşı ilə çiyin-çiyinə döyüşən Azərbaycan qadının  şücaətini, qorxmazlığını çoxunuz izləmisiniz! Bax, o genetikanın sahibidir bizim qadınlar.  

Amma Azərbaycan ordusu qüdrətli və rəşadətli bir ordudur. Bunu bir daha Vətən müharibəsində  dünya da təsdiq etdi. Məsələn, Böyük Britaniya müdafiə naziri Ben Uollisin ordumuzla bağlı verdiyi şərh  yetər ki,  Azərbaycanın Silahlı Qüvvələrinin öz ərazisini qorumaq gücündə olduğunu  bir daha təsdiqləyəsən. Buna görə, qadınlar üçün ümumi hərbi mükəlləfiyyətə ehtiyac yoxdur. Qeyd etdiyim kimi, qadınlarımız genetik olaraq  qəhrəmanlığa , mübarizəyə, düşmənə qarşı  müharibəyə  girməyə meyillidir və  hərbi sahəni seçən kifayət qədər Azərbaycan qadınları var. 

Xatırlayırsınızsa, hələ müharibədən Müdafiə Nazirliyinin yaydığı məlumatda qeyd olunurdu ki, Azərbaycan Ordusunda  10 mindən artıq qadın xidmət edir və həmin xanım hərbçilə tibb, rabitə, hüquq, sənədləşmə və təminat bölmələrində xidmət göstərirlər. 

Son olaraq, bir nüansı da qeyd edim, “Azərbaycan qadını” adı  çox ucadır, dünyada heç bir qadın Azərbaycan qadını qədər fədakar ola bilməz!  Azərbaycan kişisi üçün bu ad  namus məsələsidir. Məhz buna görə , qadının məcburi hərbi mükəlləfiyyəti mümkün deyil. Döyüşdə təsadüfən əsir düşəcək qadını xalq olaraq mənəvi cəhətdən  sınmaq kimi  qəbul edərik. Belə halı, (Allah eləməsin ki, bir də  baş versin) Azərbaycan kişisi qəbullana bilməz! Odur ki, məhz milli mənəvi dəyərlərimizin  yaradıcısı olan qadına- anaya  yüksək qiymət verilməsi baxımından   qadınların məcburi hərbə cəlb edilməsi mümkün deyil”  -deyə polkovnik Elmar Hüseyn qeyd edib.

 Söhbətləşdi: Əntiqə Rəşid