Yalçın Rəfiyev: Əhalinin mənzillə təmin edilməsi üçün beynəlxalq maliyyələşmənin genişləndirilməsi lazımdır 

Əhalinin iqlimə davamlı mənzillə təmin olunması qlobal iqlim gündəliyi ilə birbaşa bağlıdır və beynəlxalq maliyyələşmə mexanizmlərinin genişləndirilməsini tələb edir.

Oxu24.com  xəbər verir ki, bunu Azərbaycanın xarici işlər nazirinin müavini Yalçın Rəfiyev Bakıda WUF13 çərçivəsində keçirilən tədbirdə bildirib.

Onun fikrincə, insanların əlçatan mənzillə təmin olunması mücərrəd siyasi məsələ deyil, insan hüquqlarının fundamental problemidir.

Y.Rəfiyev hesab edir ki, keyfiyyətli yaşayış şəraitinə bərabər çıxış imkanı sosial bərabərsizlik səviyyəsini aşağı salır, bu sahədəki çatışmazlıq isə dövlətlərdə sosial gərginliyin və daxili qeyri-sabitliyin artmasına səbəb ola bilər.

Rəfiyev qeyd edib ki, müasir yaşayış obyektləri iqlim riskləri mütləq nəzərə alınmaqla inşa edilməlidir, lakin maliyyə vəsaitlərinin çatışmazlığı bu prosesi ciddi şəkildə ləngidir: "COP29-da biz yeni kollektiv kəmiyyət hədəfinə dair konsensus qərarının qəbul edilməsi üçün ölkələr arasında körpülər yaratmağa nail olduq".

O izah edib ki, maliyyə dəstəyi üzrə təsdiq edilmiş 300 milyard dollar məbləğində hədəf göstəricisi ehtiyacı olan dövlətlərə nəinki adaptasiya tədbirlərini həyata keçirməyə, həm də dayanıqlı evlər tikməyə imkan verəcək.

Diplomat qeyd edib ki, COP29 sədrliyi iqlim dəyişikliyinin fəsadlarının yumşaldılması və onlara adaptasiya tədbirlərinin bərabər əhəmiyyət kəsb etdiyini ardıcıl olaraq müdafiə edib, çünki ən həssas regionlar eyni zamanda kəskin mənzil böhranı yaşayır.

Onun fikrincə, aşağı karbonlu şəhərsalmanın maliyyələşdirilməsi üçün səmərəli mənbə Bakıda (2024-cü ilin noyabrında COP29-da - red.) razılaşdırılmış Paris Sazişinin 6-cı maddəsi ilə işə salınması nəzərdə tutulan karbon bazarları ola bilər.

Rəfiyevin sözlərinə görə, COP və WUF çərçivəsində proseslər sıx əlaqələndirilməlidir. O xatırladıb ki, Azərbaycan hər iki qlobal platformanın sədrliklərini özündə birləşdirən Bakı Davamlılıq Koalisiyası təşəbbüsünü irəli sürüb.

"Gələcəkdə biz beynəlxalq ictimaiyyətə tövsiyələr hazırlamaq üçün bu sədrliklərin diqqətini maliyyələşdirmənin həyata keçirilməsi vasitələrinə cəmləyə bilərik", - nazir müavini qeyd edib.

Həmçinin oxuyun

Kəmaləddin Heydərov ona vəzifə verdi

Toya hazırlaşanlara vacib xəbər:10 faiz artım var

12 avqustda bizi nələr gözləyir? — ULDUZ FALI

12 avqustla bağlı XƏBƏRDARLIQ