Yaxşı görmək üçün hansı vitaminləri qəbul etməliyik?

TİBB

728

14.04.2026, 19:50

Görmə qabiliyyətinə təsir edən vitamin və mikroelement çatışmazlıqları

Görmə funksiyasının normal fəaliyyəti üçün bir sıra vitamin və mikroelementlərin balanslı şəkildə qəbul olunması vacibdir. Bu maddələrin çatışmazlığı müxtəlif göz problemlərinə səbəb ola bilər.

Oxu24.com xəbər verir ki,ən önəmli faktorlardan biri Omeqa-3 yağ turşularının çatışmazlığıdır. Bu maddələr gözün torlu qişasının sağlamlığı üçün vacibdir və onların azlığı zamanla görmə kəskinliyinin zəifləməsinə təsir göstərə bilər.

Vitamin A və sink çatışmazlığı xüsusilə gecə görməsinə mənfi təsir edir. Bu halda alatoran görmə zəifləyir, gecə korluğu əlamətləri yarana bilər və insan zəif işıqda ətrafı aydın görə bilmir.

Uzunmüddətli Vitamin A (retinol) çatışmazlığı görmə sahəsində pozuntulara, bəzi hallarda isə skotomalar adlanan kor sahələrin yaranmasına səbəb ola bilər. Bu dəyişikliklər bəzən pasiyent tərəfindən hiss olunur, bəzən isə yalnız oftalmoloji müayinə zamanı aşkarlanır.

Bundan əlavə, lutein və zeaksantin kimi antioksidantların azlığı gözün sarı ləkə (makula) hissəsinə təsir edir. Bu maddələr görmə mərkəzinin qorunmasında mühüm rol oynayır və onların çatışmazlığı yaşla bağlı makulyar degenerasiya riskini artıra bilər.

Sink çatışmazlığı bəzi hallarda işığa həssaslığın artmasına (fotofobiya) da səbəb ola bilər.

Ümumilikdə, göz sağlamlığının qorunması üçün balanslı qidalanma və vitamin-mineral ehtiyaclarının qarşılanması vacibdir. Davamlı görmə problemləri olduqda isə mütləq oftalmoloqa müraciət edilməlidir.

Hazırladı: Jalə

Həmçinin oxuyun