Aparıcı Hacı Nuran Hüseynov hazırda xəstəxanada olan Xalq artisti Elmira Rəhimovanı ziyarət edib. SİA-nın məlumatına görə, aparıcı ona xoş sözlərini bildirib: "Onu heç xəstə yatağında görmək istəməzdim. Amma nə edəsən ki, yaş öz sözünü deyir. Elmira Rəhimovanı həmişə gümrah görməyə adət etmişəm. Düzdür, son vaxtlar səhhətindəki problemləri bilirdim, buna baxmayaraq, özünü sındırmır, zarafatla da olsa "Maşallah, top kimiyəm", deyirdi.

Elmira Rəhimova mənə anam qədər əziz olan bir insandır. Onun barəsində nə qədər söz desəm yenə azdır. Onun Azərbaycan incəsənətində xüsusi yeri var. Ən azından heç kim onun kimi hind mahnılarını sevə-sevə oxumadı. Açığını desəm, nəinki hind mahnılarını, elə Hindistanın özünü də Elmira xanıma görə sevdim.

O cür böyük sənətkarı xəstə çarpayısında görmək mənə də pis təsir etdi. Amma həmişəki kimi optimistdir.

Arzusunu da dedi: "Bir bağ evim olsun, həyətində oturardım. Doyunca nəfəs alım". Elmira ana, yastığın yüngül olsun. Allahdan sənə ancaq şəfa diləyirəm".