Aysel səhnəyə qayıdır- Video

Azərbaycanın“Avroviziya-2009“ təmsilçisi, tanınmış müğənni Aysel Teymurzadə səhnəyə qayıdır.

Oxu24.com xəbər verir ki, ailə həyatı qurduqdan sonra fəaliyyətinə ara verən müğənni son zamanlar paylaşımları ilə diqqət çəkir. Sosial şəbəkə hesabında aktivləşən müğənni kiçik məclislərdə etdiyi çıxışların videolarını da izləyiciləri ilə bölüşür. 

Artıq Aysel Yeni il tədbirlərinə də qatılır. O, “İTV”nin yayımladığı tədbirin anonsunda hətta “Bu gecə səhnəyə dönənlər” kimi təqdim olunub.  

Xatırladaq ki, bir neçə ay öncə Aysel Teymurzadənin həyat yoldaşı - Azərbaycan Dövlət Filarmoniyasının direktoru, Xalq artisti Murad Adıgözəlzadədən boşanması ilə bağlı iddialar yayılmışdı. Daha sonra müğənni həyat yoldaşı ilə birlikdə görüntüləndiyi videonu paylaşaraq söz-söhbətə son qoymuşdu.

Bu xəbərlərin yaranmasına səbəb isə Murad Adıgözəlzadənin işçisi olan xanımla səmimi münasibətinin olması, hətta Adıgözəlzadənin onunla evlənəcəyini bildirməsi iddiaları idi. Filarmoniyanın direktoru bu haqda danışmasa da, məsələdə adı hallanan qadın iddiaları təkzib etmişdi. Məlumatların mədəniyyət ocağının imicinə zərər yetirməsinə baxmayaraq, xəbərlər haqda rəsmi reaksiya da verilməyib.

Qeyd edək ki, Aysel Teymurzadə və Murad Adıgözəlzadə 2012-ci ildə ailə həyatı qurub. Cütlüyün 3 övladı var.