Polis çağırışı zamanı vətəndaş hansı hüquqlara malikdir?  

Polis orqanları tərəfindən vətəndaşların çağırılması hüquqi prosedur çərçivəsində həyata keçirilir və bu zaman hər bir şəxsin müəyyən hüquqları və öhdəlikləri mövcuddur. Hüquqşünasların sözlərinə görə, bu prosesdə əsas məsələ çağırışın qanunauyğun şəkildə olub-olmamasının dəqiqləşdirilməsidir.

Hüquqşünas Ülvi Nağıyev Oxu24.com-a açıqlamasında bildirib ki, ilk növbədə vətəndaşa edilən çağırışın rəsmi olub-olmadığı müəyyən edilməlidir. Əgər çağırış vətəndaşa rəsmi “çağırış vərəqəsi” vasitəsilə təqdim olunubsa, həmin sənəddə mütləq çağırış edən orqanın adı, çağırılan şəxsin gəlməli olduğu tarix, eləcə də çağırışı imzalayan polis əməkdaşının adı və vəzifəsi göstərilməlidir. Bu məlumatların olmaması çağırışın düzgün rəsmiləşdirilmədiyini göstərə bilər.

Əgər çağırış telefon vasitəsilə edilibsə, vətəndaşın hüququ var ki, çağırışın səbəbini, onu dəvət edən əməkdaşın adını, soyadını və vəzifəsini dəqiq şəkildə öyrənsin. Bu, şəffaflığın təmin edilməsi və prosesin hüquqi çərçivədə aparılması üçün vacib hesab olunur.

Mütəxəssis qeyd edir ki, polis vətəndaşı müxtəlif statuslarda – şahid, zərərçəkmiş və ya şübhəli şəxs kimi çağıra bilər. Hər bir halda çağırılmanın məqsədi və səbəbi vətəndaşa açıq şəkildə izah edilməlidir. Bu, şəxsin öz hüquqlarını bilməsi və prosesdə düzgün iştirak etməsi baxımından mühüm əhəmiyyət daşıyır.

Hüquqşünasın sözlərinə görə, polis çağırışından yayınmaq düzgün yanaşma deyil. Vətəndaşın çağırışa getmək öhdəliyi var və üzrlü səbəb olmadan gəlmədikdə, qanunvericiliyə uyğun olaraq məcburi gətirilmə barədə qərar qəbul edilə bilər.

Eyni zamanda, çağırışa gedən şəxsin hüquqları da qorunur. Vətəndaş ifadə verməzdən əvvəl və ya istintaq zamanı vəkilin iştirakı ilə hərəkət edə bilər. Vəkillə birlikdə iştirak etmək onun hüquqlarının daha peşəkar şəkildə müdafiə olunmasına imkan yaradır.

Bundan əlavə, vətəndaşın susmaq hüququ da mövcuddur. Şəxs özünü ittiham edən və ya zərər verə biləcək suallara cavab verməkdən imtina edə bilər və bu, qanunla onun hüquqlarının pozulması hesab edilmir.

Hüquqşünas vurğulayır ki, vəkilin iştirakı xüsusilə vacibdir. Vəkil proses zamanı mümkün prosedur pozuntularının qarşısını alır, vətəndaşın hüquqlarını qoruyur və istintaqın qanun çərçivəsində aparılmasına nəzarət edir.

Nəticə etibarilə, polis çağırışı ilə üzləşən hər bir vətəndaş həm çağırışın qanuniliyini yoxlamalı, həm də öz hüquqlarını bilməli və onlardan düzgün istifadə etməlidir.

Nigar

Həmçinin oxuyun

Pensiya və sosial müvinətlərlə bağlı ŞAD XƏBƏR 

Paytaxtda hər şey dəyişir: Yeni Bakı necə OLACAQ?

Bakıdan Paşinyanın qələbəsinə baxış: İlham Əliyevin hansı fikri  seçki debatlarında 100 dəfədən çox səsləndirilib?   

Bağı olanlara ŞAD XƏBƏR