Azərbaycan hərbi reytinqdə yüksəlmək üçün nə etməlidir? Polkovnik AÇIQLADI

HƏRBİ

01.07.2026, 12:54

Dünyanın nüfuzlu araşdırma mərkəzləri hər il ölkələrin hərbi güc reytinqini tərtib edir. ABŞ-ın "Global Firepower" (GFP) analitik qrupu tərəfindən 60-dan çox meyar əsasında hazırlanan builki "Güc İndeksi"ndə (Power Index) qardaş Türkiyə yenə ilk onluqda qərarlaşıb. Azərbaycan isə 2026-cı il üzrə Cənubi Qafqazda liderliyini qoruyaraq ilk 60 ölkə arasında yer alıb.44 günlük Vətən müharibəsində qazanılan şanlı qələbədən sonra Silahlı Qüvvələrimizin bu mövqedə qərarlaşması müsbət hal hesab olunsa da, qarşıda ordunun daha da gücləndirilməsi üçün mühüm vəzifələr dayanır.

Bəs Azərbaycanın gələcək illərdə reytinqdə daha yüksək pillələrə qalxması üçün hansı istiqamətlərdə inkişaf vacibdir? Mövzu ilə bağlı hərbi ekspert Üzeyir Cəfərov Oxu24.com-a açıqlama verib.

Üzeyir Cəfərov qeyd edib ki, Azərbaycan son illərdə davamlı olaraq yeni silah-sursat alır, hərbi hissələri modernləşdirir və xüsusilə "Komando" hərbi hissələrinin, xüsusi təyinatlıların sayını artırır. Ekspertin sözlərinə görə, sovet dövründən qalma bəzi hərbi hissə və birləşmələr artıq tarixin yaddaşına köçür və onlar yeni tələblərə uyğun yenidən formalaşdırılır. Reytinqdə daha da irəliləmək üçün bu proseslər sürətləndirilməlidir.

Hərbi ekspert vurğulayıb ki, ordunun gücü təkcə texnika ilə ölçülmür:“Bu, təkcə döyüş hazırlığı ilə bağlı deyil. Şəxsi heyətin mənəvi-psixoloji hazırlığı, o cümlədən silah-sursatın müasir qlobal tələblərə cavab vermə məsələləri burada mühüm rol oynayır. Bir sözlə, beynəlxalq araşdırma mərkəzlərinin reytinqdə ölkəmizə daha yüksək yer verməsi üçün Azərbaycan bu nüansların hər birini tam yerinə yetirməlidir".

Azərbaycanın hərbi sahədə bir sıra üstünlüklərə malik olduğunu deyən Ü. Cəfərov, həm yerli Müdafiə Sənayesi Nazirliyinin fəaliyyətini, həm də tərəfdaş ölkələrlə müştərək layihələri qeyd edib. Ölkəmiz həm daxili imkanlar, həm də müttəfiqlərlə ikitərəfli və çoxtərəfli münasibətlər hesabına ordunu ən yeni avadanlıqlarla təmin edir.Son vaxtlar Azərbaycanın həm Avropa, həm də Orta Asiya respublikaları ilə "güclü ordu modeli" yaratmaq istiqamətində işləri sürətlənib.

“Nöqsanlar hər yerdə var, hədəf isə daimi hazırlıqdır”

Ekspert bildirib ki, dünyanın ən aparıcı ordularında — ABŞ, Fransa, İngiltərə, Türkiyə və Pakistanda belə müəyyən nöqsan və çatışmazlıqlar mövcuddur. Lakin əsas hədəf qlobal və regional proseslərin fonunda Silahlı Qüvvələrimizi hər an döyüşə hazır vəziyyətdə saxlamaqdır. Azərbaycan həm quruda, həm də suda baş verə biləcək bütün təhdidlərin qarşısını almaq üçün hərbi potensialını daim təkmilləşdirməlidir.

Çimnaz Telmanqızı

Həmçinin oxuyun