Avtobusla işə gedənlərin həyatı üçün böyük risk – Nə etmək olar?

Koronavirus pandemiyası dövründə  ictimai nəqliyyatda yoluxma riski daha böyükdür. Bu səbəbdən hökumət metronun fəaliyyətini dayandırıb, digər ictimai nəqliyyat növlərinin hərəkəti isə məhdudlaşdırılıb. 

Lakin bu gün faəliyyəti dayandırılmayan dövlət və özəl təşkilatlar var. Həmin təşkilatların əməkdaşları bir çox hallarda ictimai nəqliyyatdan istifadə edir. Nəqliyyat üzrə ekspert Ərşad Hüseynov da hesab edir ki, bu, çox təhlükəlidir. 

“Xüsusi karantin rejimində fəaliyyəti dayandırılmayan dövlət və özəl təşkilatların əməkdaşlarının işə gedib-gəlmək üçün 4 variant var. 

Birinci variant şəxsi avtmobildən istifadə edərək işə gedib-gəlməkdir. Bu kifayət qədər yaxşı variantdır. Çünki şəxsi avtomobildə qorunmaq daha asandır. Lakin bəllidir ki, hamının avtomobili yoxdur.

İkinci variant işə piyada gedib-gəlməkdir. Bu variant isə yalnız iş yerləri evlərinə yaxın vətəndaşlar üçün keçərlidir.

Üçüncü variant ictimai nəqliyyatdan istifadə edərək işə gedib-gəlməkdir. Şəxsən mən bu variant təhlükəli hesab edirəm. Çünki ictimai nəqliyyatda ən müxtəlif səbəblərdən virusa yoluxma riski daha böyükdür. 

Nəhayət, dördüncü və hələ ki, geniş tətbiq edilməyən variant fəaliyyəti dayandırılmayan təşkilatlar üçün avtobus servislərinin ayrılmasıdır. Hesab edirəm ki, bu ən gözəl variantdır və bunu tətbiq etmək mümkündür. Bunu dövlət də edə bilər. Yaxud imkanı olan özəl təşkilatlar müvəqqəti olaraq avtobus kirayələyə bilər. Hər halda həyat və sağlamlıq üçün bu adımı atmaq olar”,  - deyə ekspert bildirib.

Yenisabah.az məsələ ilə bağlı Dövlət Avtomobil Nəqliyyatı Xidməti (DANX) ilə də əlaqə saxlayıb. Qurumun mətbuat xidmətinin rəhbəri Nuridə Allahyarova bildirib ki, Operativ Qərargahın qərarına uyğun şəkildə şəhərdaxili və rayondaxili marşrut xətlərinin hərəkətinə məhdudiyyət qoyulmadığı üçün, xüsusi avtobusların cəlb edilməsinə lüzum görülmür. 

“Məhz avtobusun salonunda yoluxma riskini azaltmaq üçün də xüsusi tələblər hazırlanıb - ara məsafəsinin qorunması, sərnişinlərin zəruri səbəblərinin yoxlanılması kimi. Və bu da dediyiniz riski minimuma endirmək üçündür. Respublikada hər qurumdan məhdud sayda işçinin işə çıxmasına dair göstəriş var. Hər qurumdan məhdud sayda işçini daşımaq üçün avtobuslar əlavə olunsa, üstəlik də digər müntəzəm marşrut xətləri də eyni zamanda fəaliyyət göstərsə kifayət qədər xaotik və arzuolunmaz vəziyyət yaranar. Bütün hallarda Qərargahın verəcəyi qərarlara uyğun hərəkət edəcəyik”, - deyə Nuridə Allahyarova əlavə edib.