KİV: Sirli təyyarə qəzası Pekini silkələdi

DÜNYA

487

01.07.2026, 15:47

Pekindəki ən hündür göydələnə çırpılan sirli təyyarənin qəzası ilə bağlı suallar hələ də cavabsız qalır. Pilotun həlak olduğu, 13 nəfərin yaralandığı hadisədən sonra Çin hakimiyyətinin ciddi informasiya məhdudiyyətləri tətbiq etdiyi bildirilir.

Oxu24.com xarici KİV-lərə istinadən xəbər verir ki, Pekinin ən hündür binası olan 109 mərtəbəli CITIC Tower-a kiçik təyyarənin çırpılmasından dörd gün keçməsinə baxmayaraq, qəzanın necə və hansı səbəbdən baş verdiyi hələ də məlum deyil. Dünyanın ən ciddi nəzarət olunan hava məkanlarından birinə malik şəhərdə baş verən hadisə Çin rəhbərliyinin sükutu və senzura tədbirləri ilə müşayiət olunur.

Hadisə Çin Kommunist Partiyasının qərargahı olan Çjunnanxay kompleksindən cəmi bir neçə kilometr məsafədə baş verib. Qəza ilə bağlı indiyədək yeganə rəsmi məlumat dövlət nəzarətində olan “Beijing Daily” qəzetində dərc edilmiş 60 sözdən ibarət qısa xəbər olub.Cümə günü baş vermiş toqquşma nəticəsində CITIC Tower-ın xarici hissəsinə ciddi ziyan dəyib, lakin zədələnmiş ərazilər qısa müddətdə bağlanıb. Hadisədən dərhal sonra sosial şəbəkələrdə yayılan görüntülərin isə internetdən silindiyi bildirilir.

BBC-yə danışan azı üç aviasiya şirkəti yüngül təyyarələrin fəaliyyətinin dayandırılması barədə göstəriş aldıqlarını təsdiqləyiblər. Bununla belə, onlara məsələ ilə bağlı əlavə məlumat verməmək barədə ciddi tapşırıq verildiyini bildiriblər.Rəsmi qurumların yaratdığı informasiya boşluğu təyyarənin dünyanın ən ciddi qorunan hava məkanlarından birinə necə daxil ola bilməsi ilə bağlı müxtəlif ehtimalların və müzakirələrin artmasına səbəb olub.

Pekin şəhərində dövlət rəhbərlərinin yaşadığı və fəaliyyət göstərdiyi Çjunnanxay kompleksi və Tyananmen meydanını əhatə edən təxminən 100 kvadratkilometrlik daimi uçuşa qadağan zona mövcuddur. Bundan əlavə, son dövrlərdə pilotsuz uçuş aparatları üçün qeydiyyat tələbləri də sərtləşdirilib.Çin üzrə analitik Bill Bişop sosial şəbəkədə paylaşdığı fikirlərdə hadisəni “nəhəng təhlükəsizlik pozuntusu” kimi qiymətləndirib.

Onun sözlərinə görə, təyyarə bir neçə saniyə daha uçuşunu davam etdirsəydi, birbaşa Çin Kommunist Partiyasının qərargahına çarpa bilərdi və bu, ölkənin təhlükəsizlik sistemində ciddi sarsıntıya səbəb olardı.Çikaqo Qlobal Məsələlər Şurasının tədqiqat rəhbərinin müavini Raymond Kuo isə dronlardan xeyli böyük olan bir təyyarənin şəhərin böyük hissəsini keçərək belə strateji nöqtəyə yaxınlaşmasını həm siyasi baxımdan utancverici, həm də ciddi təhlükəsizlik boşluğu kimi dəyərləndirib.

Kuo hadisənin pilot səhvi və ya texniki nasazlıq nəticəsində baş vermiş ola biləcəyini qeyd etsə də, qəsdən törədilmiş əməl ehtimalının da tamamilə istisna edilməməli olduğunu vurğulayıb.

Həmçinin oxuyun