Tehranın Moskva ilə yeni sazişi Şimal-Cənub Beynəlxalq Nəqliyyat Dəhlizinin (ŞİTD) tamamlanmasını nəzərdə tutur.

Oxu24.com xəbər verir  ki, bu barədə RİA Novosti-yə İranın xarici işlər naziri Abbas Əraqçi bildirib.

“İqtisadiyyat istənilən beynəlxalq münasibətlərin hərəkətverici qüvvəsidir. Hərtərəfli Müqavilə iki ölkə arasında iqtisadi əlaqələrin gücləndirilməsinə xüsusi diqqət yetirir . Genişmiqyaslı nəqliyyat layihəsi İranı Rusiya ilə, oradan isə Avropa və Asiya ilə birləşdirir. Bu dəhlizin başa çatması ilə iki ölkə arasında ticarət yolları qısalacaq və xərclər azalacaq”, - deyə Əraqçi bildirib.

Şimal-Cənub Beynəlxalq Nəqliyyat Dəhlizi ticarət yolu kimi Rusiya, İran, Hindistan və dəhliz boyu səkkiz digər ölkəni birləşdirir. O, Hindistan və Cənubi Asiyadan Şimali Avropaya dəniz və dəmir yolu ilə daşımaların vaxtını və məsafəsini əhəmiyyətli dərəcədə azaltmağa imkan verir.

Bundan əvvəl Abbas Əraqçi bəyan edib ki, Rusiya Federasiyası ilə İran İslam Respublikası arasında yeni strateji saziş iki ölkə arasında əməkdaşlığın bütün aspektlərini, o cümlədən gələcəkdə Moskva ilə Tehran arasında əlaqələrin inkişafını əhatə edir.

Tehran bundan əvvəl bəyan etmişdi ki, Rusiya ilə İran arasında saziş hərbi ittifaq yaratmır.

Nigar