İsveçrə NATO üzvü ilə hərbi təlimlər keçirəcək

Neytral İsveçrə və NATO üzvü İtaliya 9-20 sentyabr tarixlərində ilk dəfə birgə hərbi hava qüvvələri təlimləri keçirəcək.

 

Oxu24.com  xəbər verir ki, bu barədə İsveçrə hökuməti məlumat yayıb.

 

“2024-cü il sentyabrın 9-dan 20-dək İsveçrə və İtaliya Hərbi Hava Qüvvələri  birgə təlim keçirəcək. İlk dəfə təşkil olunan bu təlim İsveçrə və İtaliyanın imkanlarını müqayisə edəcək, onları inkişaf etdirəcək və qarşılıqlı fəaliyyət qabiliyyətini artıracaq”, - deyə məlumatda bildirilir.

SIFEX təlimində İsveçrə F/A-18 döyüş təyyarələrindən, İtaliya Hərbi Hava Qüvvələri isə Eurofighter və F-35 qırıcılarından istifadə edəcək. İsveçrə ordusu İtaliyaya təxminən 50 hərbçi göndərəcək.

Məlumata görə, təlimlər 2004-cü ildə İsveçrə və İtaliya arasında hərbi təlim sahəsində əməkdaşlıq çərçivəsində birgə fəaliyyət haqqında imzalanmış saziş əsasında keçirilir.

Bundan əvvəl Cenevrə Təhlükəsizlik Siyasəti Mərkəzinin qlobal və inkişaf etməkdə olan risklər departamentinin rəhbəri Jan-Mark Rikli İsveçrənin Avropa İttifaqı və NATO ilə hərbi əməkdaşlığının partlayıcı olacağı fikrini bildirmişdi. Onun sözlərinə görə, NATO və Aİ ilə hərbi əməkdaşlığı genişləndirmək çağırışları İsveçrədə çoxlu mübahisələrə səbəb olacaq.

 

Miri