Bakıda qonşu qadın yaşlı kişinin evini adına keçirdi

Bakıda tək yaşayan yaşlı kişiyə baxan qonşu və sonradan gəlib babaya sahib çıxan nəvələr arasında ev üstündə məhkəmə çəkişməsi gedir.

"Ölkə.Az" xəbər verir ki, qafqazinfo-ya müraciət edən ailənin gəlini Fatmaxanım Qasımova bildirib ki, neft şirkəti həyat yoldaşı Riyad Qasımovun babası Qayfətullah Xəlilova 1972-ci ildə ev verib:

“Onun bir qızı olub, o da ailəsi ilə birgə Türkiyədə yaşayır. Baba isə o evdə tək qalıb. Onun qonşusu Ziyafət Cəlilova 2007-ci ildə yoldaşımın babası ilə himayədarlığa dair müqavilə imzalayıb.

Müqaviləyə görə, baba ölənə kimi ona baxacaq və o, öləndən sonra ev Ziyafətə qalacaq. 2007-ci ildə biz evlənəndə gəlib babaya dəvətnamə vermək istədik. Onda qonşu Ziyafət bizimlə dava etdi, polis çağırdı. Gördü ki, babanın yanına gəlib-gedirik, qorxdular ki, evi alarıq. 

2014-cü ildə Ziyafət “JEK”dən saxta arayış alıb ki, babanın evində heç kim qeydiyyatda deyil. Bundan sonra həmin ev üçün öz adına çıxarış da alıb. Ardınca da Ziyafət babanın xəbəri olmadan evi “Accessbank”a girov qoyaraq, oğlu Azər Hüseynovun adına kredit götürüb.

Kredit müqaviləsində babamın imzası olmayıb. Bank özü isə notariusda bunu yoxlatdırmayıb, saxta arayış əsasında onlara 200 min manat kredit verib. Sonra biz gəlib babanın evində yaşadıq, ev də onun qızı, yəni mənim qayınanamın adına keçirildi. 2018-ci ildə isə baba rəhmətə getdi”. 

Bundan sonra bank kredit götürən Azər Hüseynov və ona zamin duran anası Zifayət Cəlilovanı məhkəməyə verib:

“Lakin məhkəmə qərar verib ki, qalan 60 min manat borca görə bizim ev satılsın. Biz indi Ali Məhkəməyə müraciət etmişik və tələb edirik ki, kreditə görə bizim ev hərraca çıxarılıb satılmasın. Çünki krediti nə biz, nə də babam götürüb. Heç imzası da olmayıb.

Saxta sənədlərlə verilən kreditə görə niyə biz küçədə qalmalıyıq? Zifayət Cəlilovanın Saray qəsəbəsində böyük bir villası var, krediti o götürdüyü üçün hərrac da onun əmlakına yönləndirilsin. Xahiş edirəm, məsələ ictimailəşsin ki, bu işə düzgün baxılsın”.