Fermerlərə ŞAD XƏBƏR! 

Azərbaycanda birillik əkin aparan fermerlər üçün yeni güzəştli maliyyələşdirmə mexanizminin tətbiqi cərcivəsində, əkin məqsədilə götürülən kreditlər üzrə illik faiz dərəcəsinin 19 %-ə qədər olan hissəsi dövlət büdcəsi hesabına maliyyələşdiriləcək və fermerlər kredit müddətinin sonunda yalnız əsas borcu geri ödəyəcəklər.

Oxu24.com  Kənd Təsərrüfatı Nazirliyinə istinadən xəbər verir ki, yeni dəstək aləti aqrar sahəyə özəl sektor vəsaitlərinin yönəldilməsini təşviq etməklə yanaşı, fermerlərin maliyyə resurslarına çıxışını asanlaşdırmağı hədəfləyir.

"Əsas məqsəd kredit faizlərini dövlətin qarşılaması yolu ilə aqrotexniki xidmətlər üçün maliyyə əlçatanlığını yaxşılaşdırmaq və aqrar sahənin inkişafına töhfə verməkdir. Aqrar Subsidiya Şurasının qərarına əsasən, bankların fermerlərə ayırdığı əkin məqsədli kreditlərin illik faiz dərəcəsinin dövlət büdcəsi hesabına maliyyələşdirilən hissəsi 19 %-ə qədər müəyyən edilib.

Güzəştli kreditlər çəltik, qarğıdalı, darı, sorqo, digər dənli və dənli-paxlalı bitkilər (buğda, arpa, çovdar, vələmir, qarabaşaq, noxud, lobya, mərci və s.), həmçinin günəbaxan, kartof, tərəvəz və bostan bitkiləri, eləcə də texniki bitkilər – pambıq, şəkər çuğunduru, tütün və soya əkən fermerlərə veriləcək", - məlumatda deyilir.

Yeni mexanizm çərçivəsində kənd təsərrüfatı istehsal vasitələrinin, o cümlədən mineral gübrələrin, biohumusun, sertifikatlı toxumların və pestisidlərin alınması, eləcə də aqrotexniki xidmətlərdən istifadə məqsədilə müddəti 1 ili keçməyən kreditlər üzrə hesablanan faizləri Aqrar Kredit və İnkişaf Agentliyi (AKİA) ödəyəcək. Bu isə o deməkdir ki, fermerlər kreditin yalnız əsas məbləğini banka qaytaracaqlar.

"Nazirlik qeyd edir ki, subsidiya vəsaitlərinə ən çox ehtiyac əkin mövsümünün əvvəlində yaranır. Subsidiya ödənişləri isə Elektron Kənd Təsərrüfatı İnformasiya Sistemində (EKTİS) bəyan dövrü başa çatdıqdan və yoxlamalar tamamlandıqdan sonra həyata keçirildiyi üçün yeni mexanizm fermerlərin mövsümün əvvəlində lazımi maliyyəni daha operativ əldə etməsinə imkan verəcək. Bunun üçün onlar banklara və bank olmayan kredit təşkilatlarına müraciət edə bilərlər",- məlumatda bildirilir.

Bu mexanizm Prezident İlham Əliyevin 5 mart 2026-cı il tarixli "Kənd təsərrüfatında güzəştli maliyyələşdirmə barədə bir sıra məsələlərin tənzimlənməsi və bununla əlaqədar bəzi fərmanlarında dəyişiklik edilməsi haqqında" fərmanına uyğun olaraq tətbiq olunur.

Həmçinin oxuyun

SON DƏQİQƏ! Yeni rəis təyinatı baş tutub

TƏBİB-in yeni təşəbbüsü gözlənilən nəticəni verəcəkmi? – Ekspertdən qiymətləndirmə  

SON DƏQİQƏ! Məktəblərdə bu qadağan edildi:Nazir İMZALADI

Bu vəzifəyə yeni təyinat oldu