TƏHLÜKƏ: Bütün hesablar üçün eyni şifrə istifadə edirsinizsə, bu xəbəri mütləq oxuyun! 

Müasir dövrdə rəqəmsal təhlükəsizlik qaydalarına laqeyd yanaşmaq fərdi məlumatların və maliyyə vəsaitlərinin tamamilə itirilməsi ilə nəticələnə bilər. Bir çox istifadəçinin rahatlıq üçün bütün platformalarda eyni şifrədən istifadə etməsi kiber-cinayətkarlar üçün "açıq qapı" rolunu oynayır.

Məsələ ilə bağlı İT mütəxəssisi Elvin Abbasov  Oxu24.com-a  bildirib ki, eyni şifrənin müxtəlif platformalarda təkrarlanması rəqəmsal təhlükəsizlik iyerarxiyasında “vahid uğursuzluq nöqtəsi" yaradır. Bu isə zəncirvari sızma riskini qaçılmaz edir.

“Hakerlər bir şifrə ilə bütün həyatınızı ələ keçirə bilər”

E.Abbasovun sözlərinə görə, kiber-cinayətkarlar hər hansı bir ikincidərəcəli və ya zəif qorunan saytdan məlumat sızdırdıqda, xüsusi botlar vasitəsilə həmin giriş məlumatlarını saniyələr ərzində minlərlə populyar resursda (sosial şəbəkələr, bank proqramları və s.) sınaqdan keçirirlər:

“Eyni şifrənin istifadəsi, bir hesabın itirilməsi ilə bütün rəqəmsal aktivlərinizin, maliyyə məlumatlarınızın və şəxsi yazışmalarınızın eyni anda kompromisə uğramasına şərait yaradır”.

“E-poçt hesabı rəqəmsal şəxsiyyətin mərkəzidir”

Ekspert vurğulayır ki, strateji baxımdan e-poçt hesabının təhlükəsizliyi hər şeydən daha kritikdir. Belə ki, e-poçta çıxış əldə edən haker “şifrə bərpası" mexanizmləri vasitəsilə istifadəçinin bütün digər hesablarının idarəetməsini tamamilə ələ keçirir.

Necə qorunmalı? 

Bu riskləri neytrallaşdırmaq və rəqəmsal dünyada təhlükəsizliyi təmin etmək üçün mütəxəssis aşağıdakı addımları mütləq hesab edir:

 “Hər bir servis və platforma üçün ayrı, unikal və mürəkkəb kombinasiyalar təyin edilməlidir. Mütləq şəkildə hesablarda ikimərhələli təsdiqləmə aktivləşdirilməlidir. Yüzlərlə fərqli şifrəni yadda saxlamaq çətin olduğu üçün təhlükəsiz şifrə idarəetmə sistemlərindən (Password Managers) istifadə olunmalıdır”.

Unutmayın, rəqəmsal dünyada "rahatlıq" çox vaxt "təhlükəsizliyin qurban verilməsi" deməkdir. Hesablarınızı bu gündən etibarən qoruma altına alın!

Çimnaz Telmanqızı

Həmçinin oxuyun

Sürücülük vəsiqəsi ilə bağlı mühüm DETAL: Hansı halda imtahansız verilir?

Bakının bu ərazisində evlər işarələnib: Söküntü BAŞLAYIR - VİDEO  

“İgid əsgər, möhkəm dayan” mahnısı ona həsr olunubmuş -VİDEO

Qanunsuz tikili boşanmadan sonra necə bölünür? – Vəkildən AÇIQLAMA