Xalq artisti Bakını tərk edəcək

CƏMİYYƏT

652

04.05.2026, 09:49

Xəbərlərimizi Google-da izləyin

Yeniliklərdən dərhal xəbərdar olun

Abunə ol

Xalq artisti Firəngiz Mütəllimova Teleqraf İnformasiya Agentliyinin suallarını cavanlandırıb.

Oxu24.com həmin müsahibəni təqdim edir.

- Firəngiz xanım, ömrünüzün 66-cı ilinə qədəm qoyursunuz. Doğum gününüzü qeyd edirsinizmi? Bu yaş sizin üçün daha çox hesabat, yoxsa yeni başlanğıclar nöqtəsidir?

- Bu dəfəki doğum günümü qeyd etmirəm. Əsas odur, sevənlərim zəng edir. Dünən axşamdan telefonlarım susmur. Gələn həftə ailə üzvlərimizlə qeyd edəcəyik. Düşünürəm ki, bu yaş mənim üçün hesabatdır.

- Şuşaya köçməyi planlaşdırırsınızmı?

- Yayda Şuşaya gedəcəyəm. Hazırda orada genişmiqyaslı abadlıq işləri aparılır. Şuşada yaşayan rəfiqələrim var, mənə videolar göndərirlər. Hələlik köç prosesi başlamayıb. Düşünürəm ki, Şuşaya köç ilin sonuna doğru həyata keçirilə bilər. Mən də Şuşaya köçməyi planlaşdırıram.

- Ad gününüzdə yaşadığınız hissləri necə ifadə edərdiniz?

- Hər zamankı kimi. Deyim ki, qeyri-adi hadisə baş verir, yox... Zənglər gələndə xoş olur.

- Bir xanım olaraq yaş artdıqca zamanın təsirini və bununla bağlı hisslərinizi necə dəyərləndirirsiniz? Yaş kompleksiniz varmı?

- Açığını deyim ki, məndə yaş kompleksi yoxdur. Sadəcə istəyirəm ki, sağlam və bərəkətli bir ömür yaşayım.

- Bütün arzularınıza çatmısınız?

- Xeyr, bütün arzularıma çatdığımı deyə bilmərəm. Ən böyük arzularımdan biri isə artıq gerçəkləşdi - Şuşanın işğaldan azad edildiyi gün o böyük xoşbəxtliyi yaşadım. Qarabağımızın, Şuşamızın azadlığı mənim üçün ən unudulmaz anlardan biridir. Arzum odur ki, sülh daimi olsun, müharibələr bitsin, dünyada əmin-amanlıq hökm sürsün. Açıq mavi səma istəyirəm, insanların heç nədən qorxmadığı bir dünya.

- Sənətinizlə bağlı bir çox uğurlara nail olmusunuz. Maraqlıdır, bir qadın kimi xoşbəxtsinizmi?

- Əgər ailəm yanımdadırsa və bu qədər sevənim varsa, deməli, xoşbəxtəm. İnsan hər şeyi pulla ala bilər, amma bu qədər insanın məhəbbətini pulla almaq mümkün deyil. Bu da Allahın bir lütfüdür. Ona görə də çalışıram ki, özümü hər zaman xoşbəxt hiss edim.

Qadın kimi xoşbəxtəm. Evimin işıqlarını özüm yandırıb söndürə bilirəmsə, dualarımı edirəmsə, özümə və qohum-əqrəbama yemək bişirirəmsə, balalarımdan gələn şad xəbərlərlə sevinirəmsə, həmin an özümü qadın kimi xoşbəxt hiss edirəm. Ən əsası da budur.

- Ömrünüzün hansı illərinə qayıtmaq istərdiniz?

- Ömrümün yalnız uşaqlıq illərinə, anamın, atamın və qardaşımın sağ olduğu vaxtlara qayıtmaq istərdim. Sevdiyim qonşularımın hamısı sağ-salamat idi. O illərə dönüb hamısının səslərini yenidən eşitmək istərdim.

- Bəs, hansı illəri xatırlamaq istəmirsiz?

- Şuşanın işğal edildiyi gün... Əziyyət çəkən qohum-əqrəba, yaşadığımız o ağır illər... O illərə qayıtmaq, o xəbəri yenidən eşitmək istəməzdim. O vaxt Türkiyədə qastrol səfərində idim. Nələr yaşadığımı bir Allah bilir.

- Mərhum Xalq artisti Yaşar Nurinin bu gün sizitəbrik etməsini istərdinizmi?

- Yaşar Nuri və Telman Adıgözəlovun sağ olmasını istəyərdim. Amma onlar mənim üçün indi də yaşayırlar. Səsləri hələ də qulağımdadır. 50 illik yubileyimdə ikisi aparıcılıq edirdilər...

Həmçinin oxuyun