Prezidentin rütbə verdiyi şəxslər kimdir? - DOSYE

CƏMİYYƏT

1453

26.11.2025, 16:49

Prezident İlham Əliyevin noyabrın 26-da imzaladığı sərəncamla ədliyyə nazirinin müavinləri Toğrul Hüseynov və Abiddin Hüseynova III dərəcəli dövlət ədliyyə müşaviri ali xüsusi rütbəsi verilib.

Oxu24.com “Yeni Sabah”a istinadən rütbə alan nazir müavinləri ilə bağlı məlumatları təqdim edir:

Toğrul Aydın oğlu Hüseynov 1986-cı ildə Bakı şəhərində anadan olub.

2007-ci ildə Bakı Dövlət Universitetinin Hüquq fakültəsini (bakalavr), 2010-cu ildə magistraturanı fərqlənmə diploma ilə bitirib.

2022-ci ildə ABŞ-nin Missuri Universitetində dövlət idarəetməsi üzrə magistr təhsili alıb.

2024-cü ildə Azərbaycan Prezidenti yanında Dövlət İdarəçilik Akademiyasında yenidən dövlət və bələdiyyə idarəetməsi üzrə magistraturada oxuyub.

Harvard Biznes Məktəbində davamlı biznes strategiyaları üzrə ixtisaslaşma keçib.

2010-2013-cü illərdə Ədliyyə Nazirliyinin İcra xidmətində, 2013-2016-cı illərdə Qanunvericilik baş idarəsində müxtəlif vəzifələrdə, 2016-2017-ci illərdə “Azərbaycan Dəmir Yolları” QSC-də Hüquq şöbəsinin bölmə rəisi vəzifəsində çalışıb.

2017-2024-cü illərdə Prezident Administrasiyasında hüquq və qanunvericilik üzrə baş məsləhətçi olub.

2024-cü ilin aprel-sentyabr aylarında Ədliyyə Nazirliyinin Strateji planlaşdırma və monitorinq baş idarəsinin rəisi vəzifəsini tutub.

Prezident İlham Əliyevin həmin ilin sentyabr ayının 7-də imzaladığı sərəncamla ədliyyə nazirinin müavini təyin edilib.

İngilis, rus dillərini bilir.

Ailəlidir, iki övladı var.

Abiddin Qabil oğlu Hüseynov 1977-ci ildə Neftçala rayonunda anadan olub.

1997-ci ildə Bakı Sosial İdarəetmə və Politologiya İnstitutunun Politologiya fakültəsini (bakalavr), 1999-cu ildə eyni fakültənin magistr pilləsini (fərqlənmə diplomu) bitirib.

2003-cü ildə Rusiya Ədliyyə Nazirliyinin, Rusiya Hüquq Akademiyasında hüquq üzrə ikinci ali təhsil alıb.

Cenevrə, Ankara, Paris, Berlin şəhərlərində dövlət qulluqçuları və hakimlər üçün təlim və ixtisasartırma proqramlarında iştirak edib.

2000-ci ildə Konstitusiya Məhkəməsində əmək fəaliyyətinə başlayıb. 2000-2010-cu ildə məhkəmədə müxtəlif vəzifələrdə çalışıb.

2010-cu ildə Prezident İlham Əliyevin sərəncamı ilə Binəqədi Rayon Məhkəməsinin hakimi təyin edilib.

2013-2020-ci illərdə Bakı Apellyasiya Məhkəməsinin hakimi, 2020-2024-cü illərdə Ali Məhkəmənin hakimi olub.

2023-cü ildə Azərbaycan Hakimlər İttifaqının İdarə Heyətinə üzv seçilib. 2020-dən ADA Universitetində “Mülki proses” fənnini tədris edir.

Hüquq sahəsində elmi-praktiki nəşrlərin müəllifi və redaktoru olub.

Prezident İlham Əliyevin 2024-cü il iyun ayının 4-də imzaladığı sərəncamla ədliyyə nazirinin müavini təyin edilib.

Azərbaycan Respublikası Məhkəmə-Hüquq Şurasının üzvüdür.

“Tərəqqi”, “Azərbaycan Ali Məhkəməsinin 100 illiyi (1923-2023)” yubiley medalları, Məhkəmə-Hüquq Şurasının fəxri döş nişanı ilə təltif olunub.

İngilis, rus dillərini bilir.

Ailəlidir, üç övladı var.