"Övladımın kirayələrdə dünyaya gəlməsini istəmirəm" — 17 ildir  mənzil növbəsində gözləyən qazi 

Qarabağ  Müharibəsi qazisi, ikinci  qrup  Qarabağ  əlili   Həsənov  Bəymirzə  Gülmirzə  oğlu  illərdir   dövlət tərəfindən ona  veriləcək  mənzilini   ala  bilmir. 

Bu  barədə  Oxu24.com-a  qazinin  özü  məlumat  verib. Qazinin sözlərində görə,2008ci ildən mənzil siyahısında olsa da,ona düşəcək evi hələ də ala bilmir.Yaxın zamanlarda övlad gözləyən ailə yeni ev gözləsələr də,bu arzularına çata bilmirlər.

“2002-ci ildə hərbi xidmətə  yollandım. Həmin   vaxt  Füzulidə  postda  xidmət edirdim. Xidmət zamanı düşmən tərəfindən atılan güllə yarasından ağır  yaralandım. İkinci  qrup   əlillliyim  yarandı. Bu gün  həm  əlilliyə  görə pensiya, həm də Prezident təqaüdü alıram. Mənim bu  gün ən böyük problemim qanunla nəzərdə  tutulmuş mənzilin hələ  də mənə  verilməməsi ilə bağlıdır.

05.11.2008-ci ildən etibarən Qarabağ müharibəsi 2-ci qrup əlillərinin mənzil uçot siyahısındayam. Buna baxmayaraq mənzili ala bilmirəm.  Bir neçə dəfə rəsmi müraciət etmişəm. Mənim qeydiyyatım və  yaşayış yerim Yasamal rayonudur.

Cənab Prezidentin göstərişinə görə  evlər yaşayış  yerinə  uyğun şəkildə  verilməlidir. Xahiş edirəm ki, aidiyyatı qurumlar bunu nəzərə alıb mənim mənzillə təmin olunmağıma tez bir zamanda köməklik göstərsinlər.Uzun illər mənzil problemimə görə evlənə bilmirdim.

Keçən il ailə həyatı qurdum.Yaxın zamanlarda ata olacam.Övladımı kirayələrdə böyütmək istəmirəm.Atam və anam da mənim himayəmdədir.Hazırda ailəmiz 5 nəfərdən ibarətdir.Övladım dünyaya gəldikdən sonra kirayələrdə yaşamaq həm maddi, həm də mənəvi cəhətdən mənə çətindir”, - deyə   qazi   Bəymirzə   Həsənov  bildirib.

Qeyd edək ki,qazinin himayəsində olan anası  Şövkət Həsənova 11 övlad anasıdır.O, da yaranmış vəziyyətə görə,bu gün narahatlığını ifadə edir.

Həmçinin oxuyun

Leyla Əliyeva xalasını doğum günündə belə TƏBRİK ETDİ  

Respublikanın ən gənc  prorektoru  Hidayətli kimdir? - DOSYE

Onkoloq XƏBƏRDARLIQ EDİR: Xərçəng xəstəliyinə tutulduğumuzu necə bilməliyik?

Avtomobilimin işıq cihazlarında dəyişiklik edə bilərəmmi?  - SUALA CAVAB 

(Fotoda qazinin anası Şövkət Həsənova)

"Özüm qəhrəman anayam.11 övlad böyütmüşəm.Mənə uşaqlarıma görə verilməli olan sosial mənzil də verilmədi.Bu haqsızlıqdan sonra oğlum,canını vətən üçün fəda edən Bəymirzənin də haqqı tapdanır.Hazırda ailəlidir,hamımız bir yerdə yaşamağa məcburuq.Sənədləri Sosial Müdafiə Nazirliyinə təqdim etmişik.Ailə tərkibimiz də artıb.Elə deyirlər ki, gözləyin,növbəli şəkildə evlər veriləcək.Mən nə bilim növbə nə vaxt çatacaq?Bəlkə növbə çatana kimi biz həyatda olmadıq?Yaxın zamanda nəvəm dünyaya gələcək.Uşağın da,oğlumun taleyini yaşamasını istəmirəm.Bu məsələlərlə bağlı cənab Prezidentə də müraciət etmişəm.Rəsmi şəxslər standart cavab verməklə məsələdən boyun qaçırırlar",-deyə qazinin anası bildirib.

Oxu24.com ailənin istəkləri ilə bağlı Əmək və Əhalinin Sosial Müdafiəsi Nazirliyi ilə əlaqə saxlayıb.

Nazirliyin  tabeliyində  olan  Sosial Xidmətlər Agentliyinin mətbuat katibi Murad Həşimov saytımıza açıqlamasında bildirib ki, məsələ ilə bağlı hazırda sənədlərə baxılır.

"Əmək və Əhalinin Sosial Müdafiəsi Nazirliyi tərəfindən Azərbaycan Respublikasının ərazi bütövlüyünün, müstəqilliyinin, konstitusiya quruluşunun müdafiəsi ilə əlaqədar əlilliyi müəyyən edilmiş şəxslər, şəhid ailələri, uçota alınma tarixindən asılı olmayaraq, Çernobıl AES-də qəzanın ləğvi (o cümlədən hərbi xidmət vəzifələrinin (xidməti vəzifələrin) yerinə yetirilməsi) ilə əlaqədar əlilliyi müəyyən edilmiş şəxslər, gözdən əlilliyi olan şəxslər və uşaqlar üçün sosial xidmət müəssisələrinin və təhsil müəssisələrinin valideynlərini itirmiş və valideyn himayəsindən məhrum olmuş məzunları mənzil və ya fərdi evlə təmin edilirlər.  

Müharibə ilə əlaqədar əlilliyi olan şəxs Bəymirzə Gülmirzə oğlu Həsənov Yasamal Rayon İcra Hakimiyyətində mənzil növbəsinə götürülüb. Sosial Xidmətlər Agentliyi tərəfindən vətəndaşa Hövsan qəsəbəsi, Zığ şossesində yerləşən yaşayış kompleksindən mənzil təklif edilib, lakin vətəndaş imtina edib. B. Həsənov 05.05.2025-ci il tarixində otaq sayının artırılması ilə bağlı müraciət edib. Məsələyə qanunvericiliyə uyğun olaraq növbəlilik qaydasında baxılacaq",-deyə rəsmi açıqlamada qeyd olunub.

Hazırladı: Miri Məcidli