"Azanı da Raqufun can dostu,qəhrəman kəşfiyyatçı Xanı verdi"  —  Şəhid xanımı ilə MÜSAHİBƏ

Azərbaycan hərb tarixinə xüsusi əhəmiyyəti ilə düşən “Aprel döyüşləri”ndən 9 il ötür.

Oxu24.com xatırladır ki, tarixə "4 günlük müharibə",yaxud "Aprel döyüşləri" kimi düşən hərbi əməliyyat 2016-cı ilin aprelin 1-dən 2-nə keçən gecə başlayıb. Aprelin 4-nə qədər davam edən əks-həmlə tədbirləri zamanı ordumuz bir sıra ərazilərə nəzarəti ələ keçirdi.

Tərtər rayonunun Talış kəndi ətrafındakı yüksəkliklər, Cəbrayıl rayonunun Lələtəpə yüksəkliyi və Cocuq Mərcanlı, Goranboy rayonunun Gülüstan kəndi və Tərtər rayonunun Madagiz kəndi istiqamətində bəzi mövqelər düşməndən azad olundu. 

Təsadüfi deyil ki, bu gün “Aprel döyüşləri” böyük zəfərin başlanğıcı kimi xarakterizə olunur.

Bəs,”Aprel döyüşləri”ni bizə bu qədər dəyərli edən nədir? Bu sualın ən doğru cavabı şəhidlər kəlməsidir. Bəli,məhz verdiyimiz şəhidlərin sayəsində biz həmin torpaqları qazandıq. Qazanılan həmin torpaqların üzərində möhkəmlənərək növbəti,44 günlük savaşla düşmənə sonuncu, həlledici zərbəni vurduq.Bu səbəbdən də “Aprel döyüşləri”,həmin döyüşlərdə şəhid olanların qanı  ilə biz tarixə qalib xalq kimi adımızı yazdıra bildik.

Həmin döyüşlərdə şəhid olanlardan biri də "Murovun Qartalı" kimi xarakterizə olunan polkovnik-leytenant Raquf Orucovdur. Raquf Orucov 1972-ci il 12 iyulda Ağdam rayonunun Cinli kəndində Raya və İbrahim Orucovların ailəsində anadan olub.Onun anası Raya xanım 1993-cü ilin 12 iyununda Ağdam rayonunun Cinli kəndinin işğal edilməsi nəticəsində şəhid olub. Elə həmin ildən Raquf Orucov sənədlərini Bakı Ali Hərbi Ümumqoşun Komandirləri Məktəbinə vermiş, lakin ertəsi il həmin məktəbə qəbul ola bilmişdi.

Raquf Orucov Bakı Ali Hərbi Ümumqoşun Komandirləri Məktəbində iki il ərzində lazımi biliklərə yiyələnmişdi. 1996-cı ildə həmin məktəbi bitirən Raquf Orucov daha sonra Bakı şəhərində yerləşən hərbi hissələrin birinə təyinat almış, amma gənc zabit ön cəbhədə olmağa üstünlük vermişdi. 1996-cı ildə təyinatını Murovdağa almış və kəşfiyyat bölüyünün komandiri kimi fəaliyyətini davam etdirmişdi. 2003–2005-ci illər arasında Ali Hərbi Akademiyanı bitirib. Hərbi xidməti dövründə həmişə ön cəbhədə xidmət edərək, Ağdam rayonunda yerləşən “N” saylı hərbi hissənin komandiri vəzifəsinədək yüksəlib.

Raquf Orucova Murovdağda həyata keçirdiyi uğurlu kəşfiyyat əməliyyatlarınına görə  “Murov Qartalı” ləqəbi verilmişdi.2016-cı ilin aprel ayının 4-də Ağdərə rayonunun Talış kəndinin erməni işğalçılarından azad edilməsi uğrunda Xüsusi Təyinatlı Qüvvələrin tərkibində  polkovnik–leytenant Raquf Orucov sonuncu döyüşünə qatılıb və qəhrəmancasına şəhid olub. Aprelin 5-i polkovnik–leytenant Raquf Orucov Sumqayıt Şəhidlər Xiyabanında dəfn olunub.

Oxu24.com Şəhid polkovnik-leytenant  Raquf Orucovun xanımı Sevinc Orucova ilə həmsöhbət olub.

Sevinc xanım, “Aprel döyüşləri” başlanan günlə bağlı nələri xatırlayırsınız?

-9 il əvvəl  bu gün Azərbaycan Ordusu,Azərbaycan əsgəri tarixi günlər yaşayırdı.Təxminən 23 il fasilədən sonra Azərbaycan Ordusu ilk  zəfər yürüşə çıxmışdı. Bizim üçün cəbhədən ilk təlatümlü xəbərlər gələn saatlar idi. Neçə illik həsrətdən sonra qulaqlarımız qələbə xəbərlərini eşidirdi. O zaman hadisələr təzə olduğundan nə baş verdiyini o qədər də anlamırdıq.Mənim üçün  bu hadisə ilə bağlı 9 il öncəsi anlayışı yoxdur. Elə bilirəm,hər şey dünən baş verib... 

Döyüşlərdən 9 il keçdi. Həmin tarix və bu günki tarix.Aprel ayı sizin üçün eyni anlamda qalır,yoxsa mənasını dəyişib?

Həmçinin oxuyun

Ramiz Mehdiyev villasını satır : ŞOK QİYMƏT - VİDEO 

Uşaqlıqda bütün ailə üzvlərini itirən,əmisi evində döyülən,evlənməkdən qorxan və dünyadan nakam gedən aktyorumuz  

Mina sahəsindən məhsul tarlasına: Aqrar dirçəlişin hekayəsi – Millət vəkili Tahir Rzayevlə müsahibə  

Müğənni Xatun ölümdən döndü   —  Həmin həkim  onu da əməliyyat edibmiş  +FOTOLAR

-Həmin tarix tamamı ilə  fərqli idi.Həmin gündə  Azərbaycan torpaqlarının müəyyən hissəsi işğal altında idi. Bizim  igid oğullar o tarixdə zəfər cığırı açdılar.Aprel ayı mübarizənin başlanğıcı oldu. Aprel döyüşlərinin davam etdiyi  4 gün bizi 44 günə gətirib çıxardı. 2016-cı ildən 2020-ci ilədək olan aprel aylarında ürəyimizdə üzüntü,kədər hissi  var idi.2020-ci ildən sonra aprel ayına baxışımız da dəyişdi. İgidlərimiz qisasları  aldılar. Bu,böyük  biz  səadətdir...

Aprel döyüşlərindən sonra Şəhidlər Xiyabanına həmişə hüznlə gedirdim.44 günlük müharibə başlayan zaman torpaqlarımız azad olunurdu.Həmin günlərdə Raqufun məzarına tələsərdim.Gözaydınlığına tələsirdim ki, torpaqlarımız azad olur,gözün aydın...

Raquf Orucov şəhid olanda Ağdam bizdə deyildi. Bu gün Ağdam,Raquf Orucovun kəndi-Cinli yenidən bizdədir.Nələri hiss edirsiniz?Komandirin arzusu yerinə yetib...

Bəli,doğru qeyd etdiniz. Raquf Orucov şəhid olanda Ağdam işğalda idi.Raquf şəhid ananın,şəhid oğlu idi...Ağdam azad olunun günü Raquf Orucovun sağlığında hərbi hissə komandiri olduğu  komandanlığın şəxsi heyyətindən mənə zəng edib gözaydınlığı verdilər. Dedilər,bu axşam Ağdamda,Göyməsciddə olacağıq. Onlara dedim ki,Ağdama Raqufun gözü ilə də baxın...Gecə 3-də mənə zəng etdilər ki, artıq Göyməsciddəyik. Azanı da Raqufun can dostu,qəhrəman kəşfiyyatçı Xanı verdi.Bundan böyük mənə təskinlik ola bilməzdi. Elə zənn etdim ki,Raqufun özü də Ağdamdan bizə salam yetirir...

Getmisinizmi o yerlərə? 

Bəli,torpaqlarımız azad olunan kimi Ağdama getdik.Bildiyiniz kimi Raquf Orucovun anası da şəhid olub.Getdik,anasının məzarını asanlıqla tapdıq.Çünki,Raquf ora işarə qoymuşdu...Anasının məzarı təpənin üzərində idi.Daha sonra Raqufun doğulduğu Cinli kəndinə getdik...Fərruxun ətəyində,Xaçın çayının ətrafında gözəl bir kənddir.Özünün də dediyi kimi, həqiqətən də bu ərazilər cənnət-məkandır.O,yerlərdə olmaq tam başqa bir hissdir...

Raquf Orucov və anası 

"Murovun qartalı" adını haqq edən birinin həyat yoldaşı olmaq adını çiyinlərində daşımaq nə dərəcədə asandır?

Hərbçi xanımı olmaq çox çətindir.Çətin olmaqla yanaşı məsuliyyətlidir və şərəflidir.Həmişə Raqufa layiq olmağa çalışmışam.Sağlığında bacardığım qədər onun ailə yükünü azaltmağa çalışmışam.Çünki,onun çiynində ağır kəşfiyyatçı yükü var idi.İnandırım sizi mən bu gün də qəbul etmirəm ki, Raquf Orucov yoxdur.Elə hiss edirəm ki, bu gün də Raquf Orucov yanımızdadır.Həyatı onsuz davam etmək çətindir...Hər addımımızı atanda onu düşünürük.

İxtisasca vəkilsiniz, Sizcə, Vətənimizin hüquqlarını bu gün layiqincə qoruya bilirikmi?

Bəli,mən hüquqşünasam.Çalışdığım qədər digər şəxslərlə yanaşı şəhid ailələrinin də hüquqlarını qorumağa çalışıram. Düşünürəm ki, Vətənimizin,Azərbaycanımızın hüquqları Ali Baş Komandanımız tərəfindən beynəlxalq aləmdə layiqincə qorunur,müdafiə olunur.Bizim hamımız bu mübarizədə bir yerdə olmalıyıq.Mən vəkil olaraq,şəhid xanımı olaraq bacardığım qədər cəmiyyətdə vətənpərvərlik təbliğatını qurmağa çalışmışam.

Millətimə,Xalqıma dəyər verən insanam.Azərbaycan xalqı Raqufu qəhrəman kimi yola saldı.Həmin vaxt xalq arxamızda oldu.Bizə tənhalığı hiss etdirmədilər.Ona görə də bu Xalqın nümayəndəsi olmağımla fəxr edirəm.

Müsahibəni apardı: Miri Məcidli