“Azərbaycanın təcrübəsi dünyaya mühüm mesaj verdi” – Deputat Forumun geosiyasi əhəmiyyətindən DANIŞDI  

Paytaxtımızda təşkil olunan VII Ümumdünya Mədəniyyətlərarası Dialoq Forumunun açılış mərasimində Ölkə Başçısı İlham Əliyevin nümayiş etdirdiyi qətiyyətli mövqe müasir geosiyasi reallıqların və beynəlxalq təşkilatların fəaliyyətindəki dərin böhranın növbəti dəfə açıq müstəvidə təhlil edilməsinə zəmin yaratdı. BMT Təhlükəsizlik Şurasının dörd qətnaməsinin uzun illər kağız üzərində qalması fonunda Rəsmi Bakının öz gücü hesabına ədaləti bərqərar etməsi qlobal güclərin ikili standartlar siyasətinə qarşı əsl hüquq dərsidir. Mövcud beynəlxalq təhlükəsizlik sisteminin səmərəsizliyi və qəbul olunan qərarların icra edilməməsi dünya nizamında köklü islahatların aparılmasını qaçılmaz edir.

Mövzu ilə bağlı Milli Məclisin deputatı Kamran Bayramov Oxu24.com-a açıqlama verib.

Kamran Bayramov bildirib ki, Azərbaycan Respublikasının Prezidenti İlham Əliyevin VII Ümumdünya Mədəniyyətlərarası Dialoq Forumunun açılış mərasimindəki dərin məzmunlu çıxışı müasir qlobal siyasətin və beynəlxalq münasibətlər sisteminin ən ağrılı, həmçinin təxirəsalınmaz problemlərini – müharibələrin dayandırılması, sülhün və təhlükəsizliyin təmin olunması, eləcə də beynəlxalq təşkilatların bu proseslərdəki funksionallığı məsələlərini bir daha qlobal gündəmin mərkəzinə gətirmişdir:

“Bakıda ev sahibliyi edilən bu nüfuzlu qlobal tədbir fonunda Azərbaycanın keçdiyi mürəkkəb münaqişə və post-münaqişə quruculuğu yolu bəşəriyyət, xüsusən də beynəlxalq hüquq və təhlükəsizlik arxitekturasi üçün mühüm geosiyasi və praktiki dərslər ortaya qoyur. Uzun illər ərzində Ermənistanın işğalçılıq siyasəti ilə üzləşən və BMT Təhlükəsizlik Şurasının məşhur dörd qətnaməsinin kağız üzərində qalaraq otuz ilə yaxın icra olunmamasını müşahidə edən Azərbaycan, sonda beynəlxalq hüququ öz gücü və iradəsi ilə bərpa etməyə məcbur qaldı. Bu unikal tarixi təcrübə BMT və onun əsas qərarverici qurumu olan Təhlükəsizlik Şurasının münaqişələrin həlli mexanizmlərində mövcud olan dərin struktur boşluqlarını, səmərəsizliklərini və tətbiq qabiliyyətinin zəifliyini bütün çılpaqlığı ilə üzə çıxardı”.

Onun sözlərinə görə, beynəlxalq hüquq normalarının hər kəs üçün eyni dərəcədə məcburi olduğu halda, qlobal güclərin maraqlarından asılı olaraq onun selektiv tətbiqi və açıq-aşkar ikili standartlar siyasəti dünya nizamının təməl sütunlarını sarsıdır, beynəlxalq təşkilatlara olan etimadı hər gün daha da azaldır:

“Azərbaycanın təcrübəsi bir daha sübut etdi ki, əgər qlobal təsisatlar öz qətnamələrini həyata keçirmək üçün siyasi iradə nümayiş etdirməzsə və qəbul edilən sənədlər yalnız bəyannamə səviyyəsində qalarsa, suveren dövlətlər BMT Nizamnaməsinin 51-ci maddəsində təsbit olunmuş özünümüdafiə hüququndan istifadə edərək ədaləti özləri bərpa etməli olacaqlar. Bu reallıq beynəlxalq ictimaiyyət üçün o mənada ciddi dərs olmalıdır ki, sülh yalnız güclü mexanizmlər və birmənalı, tərəf tutmayan ədalət prinsipi üzərində qurulduqda davamlı ola bilər, əks təqdirdə, selektiv yanaşmalar təcavüzkarları cəsarətləndirir və yeni münaqişə ocaqlarının alovlanmasına səbəb olur”.

Kamran Bayramov qeyd edib ki, Prezident İlham Əliyevin VII Ümumdünya Mədəniyyətlərarası Dialoq Forumundakı mesajları bir daha göstərir ki, ədalətli və dayanıqlı sülhün əldə olunması üçün qlobal təhlükəsizlik sistemində köklü islahatların aparılması, beynəlxalq hüququn tətbiqində ikili standartlara son qoyulması və qəbul edilən qərarların icra mexanizmlərinin sərtləşdirilməsi qaçılmaz zərurətdir, çünki mədəniyyətlərarası dialoqun, tərəqqinin və qlobal inkişafın əsas təməli məhz güc hüququnun deyil, hüququn gücünün bərqərar olduğu ədalətli dünya nizamından keçir.

Çimnaz Telmanqızı

Həmçinin oxuyun

Minimum əməkhaqqı artırılacaq - Bu tarixdən 

Yeməkdən sonra yuxusu gələnlər BUNU BİLMƏLİDİR -SƏBƏB

Ramiz Mehdiyevin SONU

Nazirlər Kabineti bu qərarını DƏYİŞDİ