Daşınmaz əmlakın qeydiyyatı necə aparılır? – Vəkildən İZAH

SİYASƏT

19.06.2026, 21:15

Azərbaycanda daşınmaz əmlak bazarı böyüdükcə və hüquqi tənzimləmələr təkmilləşdirildikcə, vətəndaşları ən çox maraqlandıran və zaman-zaman müəyyən çətinliklərlə qarşılaşdıran mövzulardan biri də mülkiyyətin sənədləşdirilməsi prosesidir. Xüsusilə keçmiş illərdə müvafiq dövlət orqanları və ya bələdiyyələr tərəfindən verilmiş sənədlərin bu gün tam hüquqi qüvvəyə malik olub-olmaması, mənzil və torpaq sahələrinin dövlət qeydiyyatına alınması qaydaları əhali arasında geniş müzakirələrə səbəb olur. Vətəndaşların bu istiqamətdə qarşılaşdığı suallara aydınlıq gətirmək, hüquqi prosedurları və qanunvericiliyin tələblərini dəqiq izah etmək məqsədilə xəbər portalımıza mühüm açıqlamalar verilib.

Vəkil Vəfadar Piriyev Oxu24.com-a açıqlamasında əmlakın dövlət reyestrində qeydiyyatı, eləcə də qanuni əsas sayılan sənədlərin tam siyahısı barədə ictimaiyyəti məlumatlandırıb. Vəkil, vətəndaşların əlində olan hansı sənədlərlə maneəsiz şəkildə "çıxarış" (kupça) ala biləcəklərinin hüquqi tərəflərini detallı şəkildə bölüşüb.

Vəkil qeyd edib ki, daşınmaz əmlakın dövlət reyestrində qeydiyyatını aparan yeganə səlahiyyətli rəsmi orqan Azərbaycan Respublikasının İqtisadiyyat Nazirliyi yanında fəaliyyət göstərən Daşınmaz Əmlakın Dövlət Reyestri Xidməti publik hüquqi şəxsdir.

Mülkiyyətini qeydiyyata aldırmaq istəyən vətəndaşlar qeydiyyatla bağlı müraciətlərini aşağıdakı rəsmi vasitələrlə rahatlıqla icra edə bilərlər:

•”ASAN xidmət" mərkəzləri vasitəsilə birbaşa müraciət etməklə;

•Poçt vasitəsilə Daşınmaz Əmlakın Dövlət Reyestri Xidmətinin özünə sənədləri göndərməklə;

•Xidmətin müvafiq şəhər və rayonlar üzrə fəaliyyət göstərən ərazi idarələrinə müraciət etməklə.

Vəfadar Piriyevin sözlərinə görə, "Daşınmaz əmlakın dövlət reyestri haqqında" Qanunun 8-ci maddəsinə və cənab Prezident tərəfindən qəbul olunmuş 2015-ci il tarixli, 439 nömrəli Fərmana əsasən, vətəndaşa qanuni şəkildə ayrılmış, verilmiş, onun istifadəsinə və ya icarəsinə buraxılmış əmlaklar müvafiq sənədlər əsasında mütləq qeydiyyata alınmalıdır.

Qanunla tam dövlət qeydiyyatına əsas verən və hüquq-müəyyənedici sayılan sənədlər qrupuna aşağıdakılar daxildir:

1.Bələdiyyələrin yarandığı tarixdən 2006-cı ilə qədər olan dövrdə torpaq sahəsi ayırmaq barədə verdiyi rəsmi qərarlar (həmin dövrdə qanunvericiliyə əsasən bələdiyyələr bu sahədə səlahiyyətli idilər).

2.1999–2000-ci illərə qədərki dövrdə rayon və şəhər icra hakimiyyətləri tərəfindən torpaq sahələrinin ayrılması və ya mülkiyyətə verilməsi barədə imzalanmış sərəncamlar.

3.Köhnə SSRİ və erkən müstəqillik dövründə Xalq Deputatları Soveti, eləcə də müvafiq sovetliklər tərəfindən vətəndaşlara qanuni şəkildə ayrılmış torpaq və yaşayış sahələrinə dair sənədlər.

4.Cənab Prezidentin 439 nömrəli fərmanı ilə təsdiq olunmuş və dövlət reyestrində hüquqların qeydiyyatı üçün əsas hesab edilən köhnə nümunəli texniki sənədlər.

Vəkil mövzu ilə bağlı xüsusi olaraq qeyd edib:

“Bunlar qanunla tam şəkildə müəyyən olunmuş hüquq-müəyyənedici sənədlərdir. Vətəndaşlar bu sənədlər əsasında daşınmaz əmlakın dövlət reyestrində qeydiyyatı üçün müraciət edə bilərlər və bu qeydiyyat qanunən mütləq şəkildə aparılmalıdır”.

Çimnaz Ağayeva

Həmçinin oxuyun