Göydən yağış yox, balıq yağır: Hər il eyni ayda baş verən hadisə

MARAQLI

464

23.06.2026, 15:56

Dünyanın elə guşələri var ki, orada baş verən hadisələr insanı heyran etməklə yanaşı, həm də dərin təəccüb doğurur. Təsəvvür edin: güclü fırtına qopur, şimşək çaxır, ardınca isə göydən su damcıları yox, minlərlə canlı balıq tökülməyə başlayır. İlk baxışdan fantastik filmlərin ssenarisini xatırladan bu hadisə tamamilə realdır və hər il eyni məkanda təkrarlanır.

Oxu24.com xarici mediaya istinadən dünyanın ən qəribə və sirli təbiət hadisələrindən biri olan "Balıq yağışı"nın təfərrüatlarını təqdim edir.

Hadisə harada və nə vaxt baş verir?

Bu qeyri-adi fenomen Mərkəzi Amerikada, Hondurasın Yoro adlı kiçik şəhərində qeydə alınır. Artıq 100 ildən çoxdur ki, hər ilin may-iyun aylarında bu ərazinin sakinləri unikal bir hadisənin şahidi olurlar. Yerli əhali bu fenomeni ispanca “Lluvia de Peces” (Balıq Yağışı) adlandırır.

Hər şey adətən günortadan sonra, göy üzünü qara buludlar bürüyəndə başlayır. Dəhşətli tufan, güclü fırtına və leysan yağışından sonra fırtına qəflətən dayanır. Sakinlər küçəyə çıxanda isə bütün yolların, həyətlərin və tarlaların çırpınan, canlı balıqlarla dolu olduğunu görürlər.

Alimlər nə deyir? Hövzəsiz balıqlar haradan gəlir?

Bu hadisə illərdir dünya alimlərinin və coğrafiyaşünasların diqqət mərkəzindədir. Ən qəribə məqam ondan ibarətdir ki, göydən düşən balıqlar Yoro şəhərinin ətrafındakı şirin su hövzələrinə aid deyil. Onlar tamamilə fərqli, okean mənşəli balıqlardır.

Alimlərin irəli sürdüyü rəsmi fərziyyəyə görə, bu hadisəyə “su burulğanları" (tornado) səbəb olur. Güclü fırtına okean səthində böyük bir vakuum yaradır və suyun daxilindəki balıq qruplarını göyə sovurur. Buludların daxilində kilometrlərlə yol qət edən bu balıqlar fırtına zəifləyən kimi yağışla birlikdə quruya tökülür.

Lakin bu nəzəriyyə də bəzi suallara tam cavab verə bilmir. Məsələn, niyə burulğan okeandakı digər canlıları yox, məhz eyni növ kiçik gümüşü balıqları seçib gətirir? Bu sual hələ də elmdə tam çözülməmiş qalır.

Alimlər məsələyə rəsmi izah axtardığı halda, Yoro sakinləri bunun tamamilə ilahi bir möcüzə olduğuna inanırlar. Yerli rəvayətə görə, 1850-1860-cı illərdə bu bölgədə Xose Manuel Subirana adlı katolik bir keşiş yaşayıb. Bölgə əhalisinin həddindən artıq kasıb olduğunu və aclıq çəkdiyini görən keşiş üç gün, üç gecə Allaha dua edir ki, bu insanlara ruzi göndərsin.

Rəvayətə görə, onun duasından dərhal sonra əraziyə ilk dəfə balıq yağışı yağır. O zamandan bəri yerli sakinlər bu hadisəni keşişin duasının bir neməti kimi qəbul edirlər.

“Göydən düşən balıqları qızardıb yeyirlər”

Hazırda Yoro şəhərində bu hadisə hər il böyük bir festival kimi qeyd olunur. Fırtına bitən kimi kasıb yerli sakinlər əllərində qablar və vedrələrlə küçələrə axışır, göydən tökülən təzə balıqları toplayırlar. Onlar bu balıqlardan müxtəlif yeməklər hazırlayır, qızardır və ailəvi şam yeməyi edirlər. Hətta şəhərdə bu günə xüsusi olaraq həsr olunmuş "Balıq Yağışı Festivalı" (Festival de la Lluvia de Peces) da keçirilir.

Təbiətin bu qorxulu, həm də bərəkətli sürprizini öz gözləri ilə görmək üçün hər il may ayında dünyanın dörd bir yanından yüzlərlə turist və fotoqraf bura axın edir.

Hazırladı:Jalə

Həmçinin oxuyun