Hərbi xidmətdə əlil olanlara mənzil düşürmü? Vəkil DANIŞDI

HÜQUQ

432

30.06.2026, 14:50

Hərbi xidmət vəzifəsini yerinə yetirərkən sağlamlığını itirən və əlillik alan şəxslərin mənzil təminatı məsələsi cəmiyyətdə ən çox müzakirə olunan mövzulardan biridir.

Oxu24.com-a açıqlama verən vəkil Cahangir Qasımzadə bildirib ki, bu sahədə hüquqi tənzimləmə Azərbaycan Respublikası Prezidentinin müvafiq sərəncamları və digər normativ-hüquqi aktlarla müəyyən edilir.

Vəkilin sözlərinə görə, vətəndaşlardan tez-tez belə müraciətlər daxil olur: “Hərbi xidmət vəzifəmi yerinə yetirərkən ikinci qrup əlil olmuşam. Mənə dövlət tərəfindən mənzil verilirmi?” Bu suala cavab verərkən ilk növbədə mövcud qanunvericiliyin tələblərinə diqqət yetirmək lazımdır.

“Azərbaycan Respublikası Prezidentinin 25 avqust 2021-ci il tarixli 2499 nömrəli Sərəncamı ilə müəyyən edilmiş kateqoriyalar mövcuddur. Həmin sənədə əsasən, Vətən müharibəsi iştirakçıları, müharibə nəticəsində əlilliyi müəyyən edilmiş şəxslər, şəhid ailələri, eləcə də bəzi digər xüsusi kateqoriyalara aid vətəndaşların mənzil və fərdi evlə təmin olunması istiqamətində dövlət proqramları həyata keçirilir”, – deyə Cahangir Qasımzadə bildirib.

Onun sözlərinə görə, cəmiyyətdə bəzən yanlış təsəvvür formalaşır və insanlar hərbi xidmət zamanı əlillik əldə edən bütün şəxslərin avtomatik şəkildə mənzil almaq hüququna malik olduqlarını düşünürlər. Halbuki hər bir hal ayrıca hüquqi qiymətləndirilməlidir.

“Qanunvericilikdə konkret olaraq hansı şəxslərin bu təminatdan yararlana biləcəyi göstərilir. Bəzi hallarda hərbi xidmət zamanı xəsarət alan və ya sağlamlığını itirən şəxslər mövcud siyahıya daxil olmaya bilirlər. Buna görə də hər bir vətəndaş öz hüquqi statusunu dəqiq müəyyənləşdirməli və aidiyyəti qurumlara müraciət etməlidir”, – deyə vəkil qeyd edib.

Cahangir Qasımzadə vurğulayıb ki, qanunvericilik daim yenilənən və təkmilləşən bir sahədir. Bu gün qüvvədə olan normalar gələcəkdə yeni sərəncam və qərarlarla dəyişdirilə və ya genişləndirilə bilər.

“Tarix göstərir ki, müəyyən dövrlərdə yeni kateqoriyalar mənzil təminatı proqramlarına əlavə olunub. Sabah yeni hüquqi akt qəbul edilə və hərbi xidmət vəzifəsini yerinə yetirərkən əlillik almış digər şəxslər də bu siyahıya daxil edilə bilər. Ona görə də vətəndaşlar hüquqlarını izləməli, növbəyə durmalı və qanunvericilikdə baş verən dəyişiklikləri diqqətdə saxlamalıdırlar”, – deyə o bildirib.

Vəkilin sözlərinə görə, bu məsələ ilə bağlı məhkəmə təcrübəsi də kifayət qədər genişdir. Müxtəlif instansiyalarda baxılan işlər zamanı vətəndaşların hüquqları, onların sosial təminat imkanları və dövlət öhdəlikləri ayrıca araşdırılır.

“Məhkəmələr də qərar qəbul edərkən qüvvədə olan normativ aktları əsas götürürlər. Əgər vətəndaş özünün mənzil təminatı hüququnun pozulduğunu düşünürsə, hüquqi müdafiə vasitələrindən istifadə edə və məhkəməyə müraciət edə bilər. Lakin hər bir iş fərdi qaydada qiymətləndirilir”, – deyə Cahangir Qasımzadə vurğulayıb.

O əlavə edib ki, bəzi hallarda mənzil təminatı məsələləri yerli icra hakimiyyəti orqanlarının, bəzi hallarda isə digər dövlət qurumlarının səlahiyyətlərinə aid olur. Buna görə də vətəndaşların ilk növbədə aidiyyəti dövlət qurumlarından rəsmi məlumat almaları vacibdir.

“Ən doğru yol hüquqi məsləhət almaq, sənədləri toplamaq və mövcud statusunuzu müəyyənləşdirməkdir. Hərbi xidmət zamanı sağlamlığını itirmiş şəxslərin sosial müdafiəsi dövlət siyasətinin prioritet istiqamətlərindən biridir və bu sahədə hüquqi mexanizmlər davamlı olaraq təkmilləşdirilir”, – deyə vəkil açıqlamasında bildirib.

Nigar

Həmçinin oxuyun