“AzDrama”dan Mehriban Xanlarovanın işlə bağlı müraciətinə - Cavab

Əməkdar artist Mehriban Xanlarovanın əvvəlki işinə qayıtmaq istəməsi ilə bağlı açıqlamasına Dövlət Akademik Milli Dram Teatrından münasibət bildirilib.​

Oxu24.com  xəbər verir ki, teatrın məlumatına görə, uzun illər bu səhnədə fəaliyyət göstərmiş Mehriban Xanlarovanın teatra olan mənəvi bağlılığı və bu sənət ocağına xüsusi münasibəti anlayışla qarşılanır.

“Mehriban Xanlarova əvvəlcə yenidən işlə təmin olunması ilə bağlı müraciət edib. Məhz onun müraciəti nəzərə alınaraq, peşə fəaliyyətini davam etdirməsi məqsədilə digər dövlət teatrlarında iş imkanları, eləcə də Mədəniyyət Nazirliyinin “Teatral Akademiya” layihəsi çərçivəsində gənc aktyorlar üçün ödənişli əsaslarla ustad dərslərinin aparılması təklif edilib. Lakin o, yalnız Azərbaycan Dövlət Akademik Milli Dram Teatrında çalışmaq istədiyini bildirərək təqdim olunan alternativ təklifləri qəbul etməyib. Teatra bərpa olunması ilə bağlı son müraciəti zamanı ona bir daha izah edilib ki, əmək münasibətlərinə xitam onun öz yazılı müraciəti əsasında verilib və hazırda teatrda müvafiq vakant ştat mövcud deyil. Digər dövlət teatrlarında fəaliyyətini davam etdirməsi ilə bağlı təklifi isə o qəbul etməyib. Bununla yanaşı, hazırkı teatr təcrübəsində aktyorların yaradıcılıq fəaliyyətini yalnız daimi ştat vahidləri ilə məhdudlaşdıran hər hansı maneə yoxdur. İstənilən aktyor konkret tamaşa və ya layihəyə üzrə hər hansı teatrla tamaşaya əsasən müqavilə bağlayaraq müxtəlif səhnələrdə çıxış edə bilər. Başqa sözlə, müəyyən rol və pyesə uyğun olaraq aktyorun müxtəlif teatrlarda yaradıcılıq fəaliyyətinə cəlb edilməsi və tamaşalarda iştirakı üçün geniş imkanlar mövcuddur. Azərbaycan Dövlət Akademik Milli Dram Teatrı öz sənətkarlarının əməyinə və bu səhnəyə bağlılığına hər zaman hörmətlə yanaşıb və bundan sonra da yanaşacaq. İnanırıq ki, Azərbaycan teatrının gücü məhz sənətkarların yaradıcılıq azadlığında, təcrübəsinin gənc nəsillərə ötürülməsində və müxtəlif səhnələrdə öz sənətini yaşatmaq imkanlarında təcəssüm olunur. Eyni zamanda, gələcəkdə teatrın yaradıcılıq planları, repertuar siyasəti və konkret tamaşa layihələri çərçivəsində, yaranacaq zərurət və bədii ehtiyac nəzərə alınmaqla, Mehriban Xanlarovanın Akademik Milli Dram Teatrının ayrı-ayrı layihələrinə hər hansı formada cəlb olunması məsələsinə də baxıla bilər”, - deyə məlumatda qeyd edilib.

Həmçinin oxuyun

Dənizdə batan şəxs görün kim İMİŞ -FOTO

İlham Əliyev təbrik məktubu göndərdi

Məhərrəmlik nə vaxt bitir? 

Bakıda yeni dərs ilindən saatlar BELƏ OLACAQ