Hansı nazirlər gedir? — İlginc məlumat YAYILDI

CƏMİYYƏT

977

26.02.2026, 14:35

Azərbaycanda idarəetmə sisteminin təkmilləşdirilməsi ilə bağlı struktur islahatları hökumətdə bəzi qurumların – nazirliklərin, komitələrin, agentliklərin birləşdirilməsi və ya ləğvi ilə davam etdiriləcək.

Oxu24.com xəbər verir ki, bu barədə “AzPolitika”ya hökumətə yaxın mənbələrdən informasiya daxil olub.

Qeyd olunur ki, bir-birinin fəaliyyətini təkrar edən, yaxud oxşar olan qurumların, habelə idarəetmədə praktik fəaliyyəti zəif olan dövlət qurumlarının dairəsi müəyyənləşdirilib. Mənbə bildirib ki, onların saxlanılması dövlət büdcəsi üçün kifayət qədər maliyyə yükü yaradır.

Heç bir dəyər formalaşdıra bilməyən təsisatların yerləşdiyi binaların saxlanılması, cari fəaliyyətinin təmin edilməsi, çox sayda ştatların mövcudluğu məqsədəuyğun sayılmır. Hökumət bundan sonra dövlət təşkilatlarının və publik hüquqi şəxslərin (PHŞ) keyfiyyət əmsalına üstünlük verəcək.

Məlumatda o da bildirilir ki, bu sırada ötən 7-8 ildə yaradılan PHŞ-lərin sayının azı 2 dəfə azaldılması nəzərdə tutulur. Özünü maliyyələşdirmə imkanları olan, habelə fəaliyyət dairəsi zəruri olan təqribən 250-dək qurum saxlanılacaq, 300-ə qədər PHŞ isə ya ləğv ediləcək, yaxud birləşdiriləcək.

Bundan başqa, yerli icra hakimiyyətlərində ixtisarların daha geniş miqyasda davam etdirlməsi qərarlaşdırılıb. Bu barədə artıq yerli icra qurumlarına müvafiq təlimatlar göndərilib.

Xatırladaq ki, son günlərdə Ağsu İH-də 14, Tovuz İH-də 43, Cəlilabad İH-də isə 28 əməkdaş ixtisara düşüb, onların çalışdığı dövlət qulluğu vəzifələri də ləğv edilib.

Mənbə narahatedici fakta da diqqət çəkir. Bu da dövlət qurumları ilə yanaşı, özəl sektorda, böyük holdinq və şirkətlərdə də ixtisarların aparılması ilə bağlıdır. Qeyd olunur ki, ilin əvvəlindən işçilərin gəlir vergisinə cəlb olunması biznes və xidmət sektorunda xərcləri artırıb. Şirkət rəhbərləri artan xərclərini azaltmaq üçün ixtisara getməyi üstün tuturlar.

Mənbə vurğulayıb ki, hazırda struktur islahatları zamanı ixtisara düşən işçilərin məşğulluq problemlərinin həlli ilə bağlı məsələlərə baxılır. Onların bir hissəsi yeni qurumlarda işlə təmin olunacaq, digərlərinin ixtisas və təcrübəsinə görə ehtiyac olan başqa təşəkilatlarda işlə təmin olunması nəzərdə tutulur.

Hesablamalara görə, ixtisara düşənlərin azı üçdə biri əmək bazarında özünə yeni iş axtarmalı olacaq. Həm dövlət, həm də özəl sektorda kütləvi ixtisarlar cəmiyyətdə narahatlıq yarada bilər. Bu baxımdan, hökumətin məşğulluq məsələsini müzakirə etməsi başa düşüləndir. Real tədbirlər görülərsə, faydalı olar…

Həmçinin oxuyun