Bu nazirin 5 müavini eyni universiteti bitirib

Azərbaycanın Xarici İşlər Nazirliyinin rəhbərliyində təmsil olunan şəxslər arasında 5 nəfər eyni universiteti bitirib. Söhbət ölkənin ən qədim təhsil ocağı olan Bakı Dövlət Universitetindən gedir.

Oxu24.com  Nocomment.az-a istinadla xəbər verir ki, nazirin ən stajlı müavini olan Mahmud Məmməd-Quliyev 1972-ci ildə indi Bakı Dövlət Universitetinin hüquq fakültəsini bitirib.

77 yaşlı diplomat 1996-2001-ci illərdə Böyük Britaniya və Şimali İrlandiya Birləşmiş Krallığında, İsveç və Norveç Krallıqlarında və Danimarka Krallığındakı Azərbaycan Respublikasının Fövqəladə və Səlahiyyətli səfiri olub. O, 1993-cü ildən xarici işlər nazirinin müavini vəzifəsində işləyir.

Ceyhun Bayramovun digər müavini Araz Əzimov da bu qədim təhsil ocağının məzunudur. O, 1978-1984-cü illərdə sözügedən ali təhsil müəssisəsində oxuyub. İxtisasca şərqşünasdır.

Araz Əzimov 1994-cü ildən xarici işlər nazirinin müavini vəzifəsində çalışır.

Nazir müavini Samir Şərifov da BDU-nun məzunudur. O, 1993-1997-ci illərdə Bakı Dövlət Universitetində Beynəlxalq hüquq və beynəlxalq münasibətlər fakültəsinin Beynəlxalq hüquq ixtisası üzrə bakalavr, 1998-2000-ci illərdə həmin ixtisas üzrə magistr və 2000-2003-cü illərdə aspirantura pilləsi üzrə təhsil alıb.

Həmçinin oxuyun

Laborantlıqdan Baş nazirə kimi YÜKSƏLDİ - 70 yaşlı Əli Əsədovun DOSYESİ  

TƏSDİQLƏNDİ: Bu şəxslərə ayda 200 manat veriləcək

Əli Əsədovun vurulmasının əsl səbəbləri - Kimlər gedir və nələr olacaq... 

Hava yenə dəyişir: Dolu düşəcək, qar yağacaq – BU TARİXDƏN 

Samir Şərifov Azərbaycan Respublikası Prezidentinin 8 sentyabr 2023-cü il tarixli sərəncamı ilə xarici işlər nazirinin müavini təyin olunub.

Ölkənin ən perspektivli diplomatlarından sayılan Elnur Məmmədovun da yolu BDU-dan keçib. Məmmədov Bakı Dövlət Universitetində Beynəlxalq hüquq və beynəlxalq münasibətlər fakültəsinin beynəlxalq hüquq ixtisası üzrə bakalavr və magistr səviyyələrini fərqlənmə diplomu ilə bitirib.

2023-cü ilin iyulunda Azərbaycan Respublikası Prezidentinin Sərəncamı ilə Elnur Məmmədova “fövqəladə və səlahiyyətli səfir” ali diplomatik rütbəsi verilib.

Nazirin ən gənc müavini olan Yalçın Rəfiyev də Bakı Dövlət Universitetində təhsil alıb. Gənc diplomat 2007-ci ildə Bakı Dövlət Universitetinin “Beynəlxalq hüquq və beynəlxalq münasibətlər” fakültəsinin “beynəlxalq münasibətlər” ixtisası üzrə bakalavr pilləsini fərqlənmə diplomu ilə bitirib.

Yalçın Rəfiyev Azərbaycan Respublikası Prezidentinin 8 sentyabr 2023-cü il tarixli sərəncamı ilə xarici işlər nazirinin müavini təyin olunub.