İşıqda yatmaq infarkt və şəkər riskini artırır? — Həkimdən XƏBƏRDARLIQ

TİBB

289

27.08.2026, 14:35

Xəbərlərimizi Google-da izləyin

Yeniliklərdən dərhal xəbərdar olun

Gecə saatlarında işığı söndürmədən yatmaq və ya yataq otağında zəif işıq mənbəyi saxlamaq bir çox insan üçün adi vərdişə çevrilib. Lakin mütəxəssislər yuxu zamanı işığa məruz qalmağın orqanizmin təbii bioloji ritminə və yuxu keyfiyyətinə təsir göstərə biləcəyini bildirirlər.

Araşdırmalar da gecə saatlarında işığa məruz qalma ilə ürək-damar və metabolik problemlər arasında əlaqə ola biləcəyini göstərir. Bu səbəbdən mütəxəssislər yuxu zamanı mümkün qədər qaranlıq mühitə üstünlük verməyi tövsiyə edirlər.

Mövzu ilə bağlı Oxu24.com-a açıqlama verən həkim-mütəxəssis Dr. Üzeyir Rəhimov gecə işıqda yatmağın orqanizmə mümkün təsirləri barədə xəbərdarlıq edib.

Həkim bildirib ki, qaranlıqda yatmaqla işıqlı mühitdə yatmaq arasında fizioloji baxımdan əhəmiyyətli fərq var:

“Bu yaxınlarda Böyük Britaniyada 90 minə yaxın insanın 10 il ərzində izlənildiyi genişmiqyaslı araşdırma aparılıb. Tədqiqatın nəticələrinə əsasən, gecə saatlarında işığa məruz qalma ilə ürək-damar xəstəlikləri, o cümlədən infarkt, ürək çatışmazlığı, səyirici aritmiya və şəkərli diabet arasında əlaqə müşahidə olunub”.

Onun sözlərinə görə, insan orqanizmi gecə saatlarında qaranlıq mühitdə istirahət etməyə uyğunlaşıb:

“Gecə yuxusu zamanı qan təzyiqi aşağı düşür, stress hormonlarının səviyyəsi azalır və orqanizmdə bərpa prosesləri gedir. İşığa məruz qalmaq isə bu təbii proseslərə təsir göstərə bilər”.

Dr. Üzeyir Rəhimov gecə gec saatlarda yataraq gündüz saatlarında yuxuya üstünlük verən şəxslərin də yuxu rejiminə diqqət etməsinin vacibliyini vurğulayıb.

“Yuxu rejiminin pozulması və gecə-gündüz ritminin dəyişməsi uzunmüddətli perspektivdə ürək-damar sistemi və maddələr mübadiləsinə mənfi təsir göstərə bilər. Buna görə də mümkün qədər vaxtında yatmaq və yuxu zamanı otağı qaranlıq saxlamaq tövsiyə olunur”, – deyə həkim əlavə edib.

Həmçinin oxuyun