Qadınlarda qarınaltı ağrısı nə zaman təhlükəlidir? – Həkim açıqladı

TİBB

03.08.2026, 14:10

Qarınaltı nahiyəsində yaranan ağrılar qadınların ən çox rastlaşdığı sağlamlıq problemlərindən biri olsa da, bu şikayətin səbəbi hər zaman eyni olmur. Bəzən sadə fizioloji proseslərdən qaynaqlanan ağrılar ciddi narahatlıq yaratmasa da, bəzi hallarda qarınaltı ağrısı həyati təhlükə yarada biləcək xəstəliklərin ilk xəbərdaredici əlaməti ola bilər. Mütəxəssislər bildirirlər ki, ağrının səbəbini yalnız hisslərə əsaslanaraq müəyyən etmək mümkün deyil və bu səbəbdən belə hallarda mütləq həkim müayinəsinə ehtiyac var.

Mövzu ilə bağlı Oxu24.com-a danışan mama-ginekoloq, cərrah Vüsalə Kazımova bildirib ki, qarınaltı ağrılarının həm ginekoloji, həm də qeyri-ginekoloji səbəbləri mövcuddur və hər bir hal fərdi şəkildə qiymətləndirilməlidir. Onun sözlərinə görə, qadınlarda ən çox rast gəlinən səbəblərdən biri yumurtlama dövründə yaranan fizioloji ağrılardır. Menstrual tsiklin ortalarında baş verən yumurtlama prosesi zamanı bəzi qadınlarda qarınaltında qısamüddətli sancılar hiss oluna bilər və bu, əksər hallarda normal hesab edilir. Lakin ağrı uzun müddət davam edirsə, getdikcə güclənirsə və ya gündəlik həyata mane olursa, artıq bunun başqa səbəbləri araşdırılmalıdır.

Həkim qeyd edib ki, yumurtalıq kistaları da qarınaltı ağrılarının əsas səbəbləri sırasında yer alır. Kiçik ölçülü kistalar uzun müddət heç bir əlamət verməsə də, böyüdükdə, partladıqda və ya burulduqda qəfil başlayan çox güclü ağrılar yarada bilər. Bu kimi hallarda vaxtında tibbi yardım göstərilməzsə, ciddi ağırlaşmalar baş verə bilər.

Vüsalə Kazımovanın sözlərinə görə, qadın cinsiyyət orqanlarında yaranan iltihabi proseslər və infeksiyalar da qarınaltı ağrıları ilə müşayiət olunur. Belə vəziyyətlərdə ağrı ilə yanaşı yüksək hərarət, halsızlıq, vaginal ifrazatın dəyişməsi və ümumi vəziyyətin pisləşməsi kimi əlamətlər də müşahidə oluna bilər. Eyni zamanda uşaqlıq miomaları və endometrioz kimi xəstəliklər də uzunmüddətli və təkrarlanan ağrıların əsas səbəblərindəndir. Xüsusilə endometrioz zamanı ağrılar menstruasiya dövründə daha da güclənir və qadının həyat keyfiyyətini əhəmiyyətli dərəcədə azalda bilir.

Mütəxəssis hamiləlik dövründə yaranan qarınaltı ağrılarının da xüsusi diqqətlə qiymətləndirilməsinin vacibliyini vurğulayıb. Onun sözlərinə görə, xüsusilə uşaqlıqdan kənar hamiləlik zamanı meydana çıxan ağrılar həyati təhlükə yarada bilər. Belə hallarda ağrı ilə yanaşı qanaxma, başgicəllənmə, halsızlıq və huşun itməsi kimi əlamətlər də yarana bilər. Bu vəziyyət təcili tibbi müdaxilə tələb etdiyindən heç bir halda gözləmək düzgün deyil.

Vüsalə Kazımova bildirib ki, qarınaltı ağrılarının səbəbi yalnız ginekoloji xəstəliklərlə məhdudlaşmır. Sidik yollarının iltihabı, böyrək daşları, sidik kisəsinin xəstəlikləri, həmçinin bağırsaq problemləri, appendisit və digər həzm sistemi xəstəlikləri də oxşar şikayətlər yarada bilər. Buna görə də ağrının mənbəyini yalnız müayinə, ultrasəs və digər diaqnostik üsullar vasitəsilə müəyyən etmək mümkündür.

Həkim xüsusilə xəbərdarlıq edib ki, qarınaltı ağrısı ilə yanaşı ürəkbulanma, qusma, yüksək hərarət, vaginal qanaxma, başgicəllənmə və ya ağrının getdikcə şiddətlənməsi müşahidə olunursa, vaxt itirmədən tibb müəssisəsinə müraciət edilməlidir. Bu cür əlamətlər bəzi hallarda təcili cərrahi müdaxilə tələb edən xəstəliklərin göstəricisi ola bilər.

Mütəxəssis onu da qeyd edib ki, qadınların ən çox yol verdiyi səhvlərdən biri həkimə müraciət etməzdən əvvəl özbaşına güclü ağrıkəsici preparatlar qəbul etmələridir. Ağrıkəsicilər xəstəliyin əsas əlamətlərini gizlədərək düzgün diaqnozun qoyulmasını çətinləşdirə və müalicənin gecikməsinə səbəb ola bilər. Bu isə bəzi hallarda ağır fəsadlara, hətta reproduktiv sağlamlığın itirilməsinə qədər gətirib çıxara bilər.

Mama-ginekoloq, cərrah Vüsalə Kazımovanın fikrincə, qadınlar qarınaltı ağrılarını adi hal kimi qəbul etməməli, xüsusilə ağrı təkrarlanırsa və ya başqa narahatedici əlamətlərlə müşayiət olunursa, vaxtında həkim müayinəsindən keçməlidirlər. Erkən diaqnoz qoyulan bir çox ginekoloji və cərrahi xəstəliklər müasir tibbin imkanları sayəsində uğurla müalicə olunur və mümkün ağırlaşmaların qarşısı alınır. Buna görə də sağlamlığa laqeyd yanaşmaq əvəzinə, ilk şikayətlər yaranan andan etibarən mütəxəssisə müraciət etmək ən doğru addım hesab olunur.

Həmçinin oxuyun