Vərəm nədən yaranır?

Bu gün ümumdünya vərəmlə mübarizə günüdür .

Hər il martın 24-ü dünyada Vərəm xəstəliyinə qarşı mübarizəyə diqqət çəkmək məqsədilə Ümumdünya Vərəmlə Mübarizə Günü kimi qeyd edilir. Bu tarix təsadüfi seçilməyib. 1882-ci ilin bu günündə alman alimi Robert Kox vərəmin törədicisini – "Kox çöpü" adlanan mikobakteriyanı kəşf etdiyini elan edib. Bu kəşf xəstəliyin diaqnostikası və müalicəsində yeni dövrün əsasını qoyub.

Oxu24.com xəbər verir ki, mütəxəssislərin sözlərinə görə, vərəm ,əsasən, hava-damcı yolu ilə yayılan yoluxucu xəstəlikdir və ən çox ağciyərləri zədələyir. Xəstəlik vaxtında aşkarlanmadıqda ciddi fəsadlara, hətta ölümə səbəb ola bilər. Buna baxmayaraq, erkən diaqnostika və düzgün müalicə ilə vərəmin tam sağalması mümkündür.

Ümumdünya Səhiyyə Təşkilatının məlumatına görə, vərəm bu gün də dünyada ən çox ölümə səbəb olan yoluxucu xəstəliklərdən biri olaraq qalır. Xüsusilə sosial-iqtisadi şəraiti zəif olan ölkələrdə bu xəstəliyin yayılması daha geniş müşahidə olunur. Qurum bildirir ki, hər il milyonlarla insan vərəmə yoluxur və yüz minlərlə insan həyatını itirir.

Azərbaycanda da vərəmə qarşı mübarizə istiqamətində mühüm tədbirlər həyata keçirilir. Ölkədə xüsusi dispanserlər fəaliyyət göstərir, əhali arasında maarifləndirmə işləri aparılır və xəstələrin müalicəsi dövlət tərəfindən təmin olunur. Həkimlər bildirirlər ki, davamlı öskürək, halsızlıq, gecə tərləmələri, arıqlama kimi əlamətlər müşahidə olunarsa, mütləq tibbi müayinədən keçmək lazımdır.

Qeyd edək ki, Ümumdünya Vərəmlə Mübarizə Günü çərçivəsində dünyanın bir çox ölkəsində maarifləndirici kampaniyalar, tibbi aksiyalar və sosial tədbirlər təşkil olunur. Məqsəd ictimaiyyətin diqqətini bu təhlükəli xəstəliyə yönəltmək, onun qarşısının alınması və vaxtında müalicəsinin vacibliyini bir daha vurğulamaqdır.

Mütəxəssislər əhalini sağlam həyat tərzinə riayət etməyə, immun sistemini gücləndirməyə və profilaktik müayinələrdən mütəmadi keçməyə çağırırlar. Vərəm sağalan xəstəlik olsa da, gecikmiş müraciət hallarında ağır nəticələr qaçılmaz ola bilər.

UNUTMAYIN: Vərəm ayıb deyil, sağalan xəstəlikdir. Vaxtında müraciət həm sizi, həm də yaxınlarınızı təhlükədən qoruyur.

Çimnaz Telmanqızı

Həmçinin oxuyun

Səhiyyə Nazirliyinin Kollegiyası müvafiq qərar qəbul edib

17 iyulda bizi nələr gözləyir? — ULDUZ FALI

SON DƏQİQƏ! İrana hücuma keçdilər

İrandan şok bəyanat:Vuracaqlar...