Yarım saatlıq günorta yuxusu yaddaşı gücləndirir – ekspert rəyi

TİBB

557

23.03.2026, 20:59

Beyin və yaddaşın işləmə prinsipləri haqqında maraqlı araşdırma nəticələri açıqlanıb. Nevrolog Qalib Əsədov bildirib ki, İsveçrənin Lozanna Universitetində aparılan təcrübələr göstərib ki, qısa müddətli yuxu öyrənilən informasiyanın uzun müddətli yaddaşa köçürülməsində mühüm rol oynayır.

Oxu24.com xəbər verir ki,təcrübədə tələbələr üç qrupa bölünüb.

Birinci qrupa dərsdən sonra yatmaq, ikinci qrupa istirahət etmək, üçüncü qrupa isə dərsdə öyrəndikləri mövzu ilə bağlı əlavə araşdırma aparmaq tapşırılıb. 3 saat sonra keçirilən test nəticələrində ən yaxşı nəticə yatan tələbələrdə müşahidə olunub, ən zəif nəticə isə internetdən əlavə məlumat toplayan qrupda qeydə alınıb.

Qalib Əsədov izah edir ki, qısa müddətli yaddaşın həcmi məhduddur və çoxlu informasiyanı eyni vaxtda qəbul etmək mümkün deyil. Bu səbəbdən məlumat qısa yaddaşa düşmədikdə, uzun müddətli yaddaşa keçmir. "Bu fenomenə 'muzei sindromu' deyilir – bir çox məlumatı ardıcıl olaraq qəbul edəndə beynimiz artıq qısa yaddaşda tutduğu informasiyanı saxlaya bilmir. Yarım saatlıq günorta yuxusu – siesta – qısa yaddaşı boşaldaraq dərsdə öyrənilən biliklərin mənimsənilməsini artırır", – deyə ekspert qeyd edib.

Əlavə olaraq, Afinada aparılan araşdırmalar göstərib ki, günorta yarım saatlıq yuxu infarkt riskini 37 faiz azaldır. Qalib Əsədov vurğulayıb ki, yuxu rejimi – gecə 7-8 saat və günorta qısa yuxu – beyin funksiyaları, yaddaş və ümumi sağlamlıq üçün vacibdir.

Yəni, dərslərdə və işdə yüksək məhsuldarlığı təmin etmək, beynin məlumatları düzgün emal etməsi üçün yalnız uzun gecə yuxusu deyil, günorta siestası da önəmlidir.

Nigar

Həmçinin oxuyun