"Mövsümindən asılı olaraq hava şəraitinə görə xəstəliklər dəyişir. Hazırda yaz fəsli olduğu üçün allergik və asmatik xəstələr daha həssas olurlar".

Oxu24.com bildirir ki, bunu Metbuat.az-a açıqlamasında həkim-terapevt Nahid Məhərrəmov deyib. O bildirib ki, yaz fəslində ağacların çiçəklənmə dövrü olduğundan allergik insanlarda risk faktorları artır. Tozlanma baş verdikcə, toza qarşı allergiyası olanlarda burun axması, öskürək, qaşınma, gözdən su axma, nəfəs yollarında tutulma, tənginəfəslik, boğulma, halsızlıq əlamətləri ola bilər. Bu cür hallarda insanlar mütləq həkim allerqoloqa müraciət etməlidir.

Həkim əlavə edib ki, allergik və asmatik reaksiyası olanların immun sistemi zəif olduğu üçün virus və infeksiyalara daha tez məruz qalırlar. Bu cür xəstələr fəsil dəyişikliyi zamanı daha ehtiyatlı olmalıdır.

Həkim bildirib ki, soyuq fəsillərdə bronxit, pnevmaniya, yuxarı tənəffüs orqanlarının iltihabı, bakteriyal, virus mənşəli infeksiyalar, revmatik xəstəliklər, oynaq xəstəlikləri və s. baş qaldırır. Yaya doğru getdikcə havalar isindiyi üçün viruslar məhv olur və xəstəliklər də azalır. Ancaq istənilən hallarda allergik xəstələr ehtiyatlı olmalıdır.

Həkim-fitoterapevt Sadıq Salami deyib ki, mövsümi xəstəliklər fəsil dəyişkənliyi vaxtlarında olur. Qışdan bahara keçid zamanı immun sistemi zəifləyir. Bu da vitamin çatışmazlığı ilə əlaqəli olur. İmmun sistemi zəif olanda, orqanizm virus və infeksiyon xəstəliklərə qarşı həssas olur. Zəifləmiş orqanizm virus və infeksiyalara qarşı müqavimət göstərə bilmir. Ona görə də, virus və kəskin respirator xəstəliklər artır. Bunun qarşısını almaq üçün immun sistemini möhkəmləndirmək lazımdır. İmmun sistemini möhkəmləndirilməsi məqsədilə bal və bal məhsulları, çiçək tozu, güləm, qara zirə, exonaseya bitkilərindən istifadə etmək olar. Oxu24.com