Bakı, Ankara və Tbilisi arasında mühüm anlaşma: Regionda nələr gözlənilir?

Xəbər verdiyimiz kimi, Türkiyə, Azərbaycan və Gürcüstan xarici işlər nazirlərinin İstanbulda keçirilən 10-cu üçtərəfli görüşü başa çatıb. Regionun gələcək siyasi və iqtisadi mənzərəsini formalaşdırmaq baxımından mühüm əhəmiyyət kəsb edən bu sammitdə, tərəflər indiyə qədər əldə olunmuş razılaşmaların icrasını nəzərdən keçirib və növbəti mərhələdə atılacaq müştərək addımları müəyyənləşdiriblər. Qlobal geosiyasi gərginliyin artdığı bir dövrdə baş tutan bu xüsusi regional platforma, Bakı, Ankara və Tbilisi arasındakı strateji tərəfdaşlığın sarsılmazlığını bir daha nümayiş etdirib.

Görüşün yekunları, onun regional siyasətə təsirləri və müzakirə edilən yeni gündəm mövzuları barədə Oxu24.com-a danışan siyasi şərhçi Taleh Əliyev maraqlı məqamlara toxunub.

“Bu görüş indiyə qədərki əməkdaşlığın kəsintisiz davamıdır"

Siyasi şərhçi ilk növbədə bu formatın ənənəvi və ardıcıl xarakter daşıdığını vurğulayıb:

“Azərbaycan, Türkiyə və Gürcüstan arasında ənənəvi xarakter alan xarici işlər nazirlərinin növbəti 10-cu görüşü, indiyə qədər əldə olunmuş razılaşmaların icrasına bir daha nəzər salmaq, bundan sonra qarşıda dayanan vəzifələri və birgə atılacaq addımları müəyyənləşdirmək baxımından olduqca faydalıdır.

Amma mən düşünmürəm ki, bu görüş digərlərindən tamamilə əlahiddə, təcrid olunmuş bir hadisədir. Çünki bu, indiyə qədər uğurla başlanmış və davam etdirilən üçtərəfli əməkdaşlığın davamlılığını, kəsintisizliyini və hər üç dövlətin bu formata verdiyi önəmi, onun məqsədəuyğunluğunu təsdiqləyən növbəti bir görüşdür".

Taleh Əliyev qeyd edib ki, görüşün əsas əhəmiyyəti tərəflərin gələcəyə yönəlik ortaq mövqeyində özünü göstərir:

“Görüşün əsas əhəmiyyəti ondan ibarətdir ki, tərəflər arasında bu günə qədər əldə olunmuş razılaşmaların bundan sonra da qətiyyətlə davam etdirilməsi ilə bağlı siyasi iradə və qarşılıqlı inam bir daha təsdiq olundu. Hazırkı mərhələdə dünyada və regionda çox ciddi geosiyasi həssaslıq yaşanır. Belə bir çətin dönəmdə üçtərəfli əməkdaşlığın davam etdirilməsi və tərəflərin vahid siyasi mövqe ortaya qoyması təqdirəlayiq haldır.

Bu sammit indiyə qədər formalaşdırılmış əməkdaşlıq modelinin gələcəkdə də eyni uğurla davam edəcəyini göstərdi”.

Gündəmdəki yeni və genişlənən mövzular hansılardır?

Politoloq üçtərəfli platformanın təkcə klassik sahələri deyil, müasir çağırışları da əhatə etdiyini bildirib. Onun sözlərinə görə, bu format çərçivəsində tərəflərin qarşılıqlı əməkdaşlığı növbəti mərhələdə daha geniş sferaları əhatə edəcək:

“Regional nəqliyyat-loqistika layihələri və diplomatik koordinasiya gücləndiriləcək.

Xalqlararası inteqrasiya və mədəni mübadilə proqramları diqqətdə saxlanılacaq. Regionun təhlükəsizliyinin qorunması fonunda hərbi-strateji tərəfdaşlıq genişlənəcək.

Müasir hibrid təhdidlərə qarşı informasiya və kəşfiyyat təhlükəsizliyi istiqamətində tərəflərin sıx və qarşılıqlı əməkdaşlığı öz əksini tapacaq”.

Çimnaz Telmanqızı

Həmçinin oxuyun

Təmirə bağlanan xəstəxana ilə bağlı əhaliyə MÜHÜM XƏBƏR

İlham Əliyev və xanımı Türkiyədə belə qarşılandı - Video 

Mayor idi, 10 ay sonra general oldu -34 yaşı var

Rəşid Behbudovun qürbətdə can verən bacısı oğlu - KİMDƏN İNCİMİŞDİ?