Goranboy rayonu,Hazırəhmədli kənd tam orta məktəbin sabiq Azərbaycan dili və ədəbiyyat  müəllimi Aybəniz Əliyeva media vasitəsi ilə elm və təhsil naziri Emin Əmrullayevə  müraciət  edib.

Oxu24.com  CityPost.az -a istinadən  xəbər verir  ki, Aybəniz Əliyeva  yenidən  imtahan verərək məktəbə bərpa olunmasını istəyir. Onun  sözlərinə görə,işlədiyi məktəbin  əvvəlki    və  hazırkı direktoru ilə  arasında gərginliklər  olduğu üçün  onun imtahanda  topladığı bal qəsdən  saxtalaşdırılıb.Bu səbəbdən də 34 ildir ki, müəllim işləyən Aybəniz Əliyeva 6 aydır ki,işsiz qalıb.

“Mən təcrübəli Azərbaycan dili və ədəbiyyat müəlliməsiyəm.Sertifikasiya imtananına  qədər  məktəbdə  baş  vermiş  qanunsuz  hərəkətlərə  etiraz  edirdim. Bir neçə  dəfə  keçmiş direktor  Səadət  Abbasovanın  məktəbdə etdiyi qanunsuz əməllər barədə  şikayətlər  etdim. Direktor  mənim  onun   əməllərindən   xəbərdar  olduğumu hiss etdikdən sonra mənə qarşı  münasibəti dəyişdi. Təbii ki, məktəb direktorunun bu əməllərindən rayonda təhsillə bağlı  rəhbər  vəzifələr  tutan  başqa  şəxslərin  də  xəbəri  var idi. Bu səbəbdən də sertifikasiya imtahanları keçirilən zaman mənim imtahan nəticələrimə süni şəkildə müdaxilə olundu.İnsanların gözü qarşısında əvvəlcədən rəhbər şəxslər tərəfindən öyrədilmiş nəzarətçilər tərəfindən imtahan verdiyim kompyuterə müdaxilə edildi. Sualların əksəriyyətinin cavabını dəqiq bilirdim.Hesablamama görə doğru cavabların sayı 47 bal  olmalı idi.Amma, müdaxilədən sonra doğru cavablarımın sayı 28 bala endi. Bununla da mən  imtahandan  kəsildim.”

Aybəniz Əliyevanın iddiasına görə,onun imtahandan kəsilməsində vəzifəli şəxslərin birgə fəaliyyəti olub.

“Qeyd etdiyim kimi məktəbdə baş verən xoşagəlməz hallar barədə yuxarı qurumlara şikayət etdiyimə görə  həm məktəbdə, həm də regional idarədə arzuolunmaz şəxsə çevrildim. İmtahanlardan istifadə edərək Gəncə-Daşkəsən Regional Təhsil İdarəsinin keçmiş müdiri Anar Qədiməliyev,Goranboy-Naftalan rayonları üzrə təhsil sektorunun müdiri Xəyal Məmmədov,İctimaiyyətlə əlaqələr şöbəsinin rəhbəri Azər İbrahimov birləşərək məni təhsildən uzaqlaşdırdılar”,- deyə  keçmiş müəllimə bildirib.

Məktəbin keçmiş  Azərbaycan  dili və  ədəbiyyatı  müəllimi daha sonra bildirib ki, onun  28 balı olsa da,işsiz  qalıb.Amma, 14 bal  toplayan Sücaət Abdullayeva adlı şəxs  ondan az bal toplamasına baxmayaraq məktəbdə işlə təmin olunub. Keçmiş müəllim  bütün bunların ədalətizlik  hesab edir.

“Necə olur ki,14 bal toplayan,imtahandan kəsilən bir şəxsi məktəbə işə götürürlər, 34 ilin müəllimini,ondan çox bal toplayan birini kənarda qoyurlar? Buradan görünür ki,orada mənim əleyhimə olan şəxslər var.”

Məktəbin müəllimi olmuş Aybəniz Əliyeva indiki  direktor Təranə Cəbrayılovadan da şikayətçi olduğunu bildirib.Keçmiş müəllimənin iddiasına görə,direktor Təranə Cəbrayılova onun məktəbə qayıtmasına və hər hansı işlə təmin olunmasına maneə olanlardan biridir.

“İndiki direktor Təranə Cəbrayılovanın qanunsuz əməllərindən cana gəlmişik. Məktəbin musiqi müəllimi Sevda Məmmədovanı heç bir imtahan və müsabiqədən keçmədən kitabxanaya müdir təyin etdi.Təranə Cəbrayılovanın müavini Neman Eminov mənə və digər şəxslərə qarşı dələduzluq edərək 10 min manata yaxın pulu mənimsədi.O,bu pulları bizdən övladımı işə düzəltmək adı ilə almışdı.İndi o həbs olunub. 12.07.2024 – 31.08.2024-cü il tarixlərində Neman Eminov həbsdə olsa da,ona maaş yazılıb. İfadəsində istintaqa  bildirib ki,pulların alınmasından Təranə Cəbrayılovanın da xəbəri olub. Hətta direktor bu məsələyə görə izahat da verib. Məktəbdəki  nöqsanlar bununla da  bitmir. Direktorun tədris işləri üzrə müavini Ruhəngiz Abdullayeva və təlim-tərbiyyə işləri  üzrə müavini Xədicə Rzayeva saxta şəhadətnamə verdikləri üçün araşdırma aparılır.Bildiyimə görə,onlara cinayət işi də açılıb.

Aybəniz Əliyevanın sözlərinə görə,onun həyat yoldaşı Telman İsgəndərov I Qarabağ müharibəsinin veteranıdır. Oğlu Emil İsgəndərov isə II Qarabağ Müharibəsinin iştirakçısı olub.

“Ailə vəziyyətim olduqca pisdir.6 aydır işsizəm.Mənə süni şəkildə yaradılan bu problemə görə,övladlarımı da işə götürmürlər.Media vasitəsi ilə cənab Emin Əmrullayevə müraciət edirəm.Xahiş edirəm ki, mənim yenidən imtahan verməyimə və məktəbdə hər hansı münasib  işlə təmin olunmağıma köməklik  edəsiniz”,-deyə o bildirib.

CityPost.az məsələ ilə bağlı Azərbaycan Respublikası Elm və Təhsil Nazirliyinə sorğu ünvanlayıb.Yazıda adları hallanan digər şəxslərin də mövqeyini təqdim etməyə hazırıq.

Müşərrəfxanım