Ukraynadakı xüsusi əməliyyatlara rəhbərlik edən Rusiya Hava Kosmik Qüvvələrinin komandanı, ordu generalı Sergey Surovikin “Vaqner” Xüsusi Hərbi Şirkətinin gizli üzvü olub.

Oxu24.com  xəbər verir ki, bu barədə ABŞ-ın “CNN” televiziyası məxfi səndələrə əsasən məlumat yayıb.

Bildirilib ki, o, “Vaqner”in elit üzvləri qrupunda yer alıb. Bundan başqa, daha 30 yüksək rütbəli Rusiya hərbçisinin “Vaqner”lə gizli əməkdaşlıq etdiyi iddia olunur.

Xatırladaq ki, iyunun 24-də “Vaqner” Xüsusi Hərbi Şirkətinin başçısı Yevgeni Priqojin Rusiya hərbçilərinin “Vaqner” muzdlu hərbi təşkilatının arxa düşərgələrinə raket zərbələri endirdiyini, bir çox döyüşçünün öldüyünü açıqlayıb. O, bundan sonra Rusiyada qiyama başlayıb.

Elə həmin gün “Vaqner”çilər Rusiya Silahlı Qüvvələrinə məxsus qırıcı təyyarə və helikopterləri vurublar. Rusiya Prezidenti Vladimir Putin isə xalqa müraciətində mövcud hadisələri xəyanət kimi qiymətləndirib.

Məlumata görə, Y.Priqojin Belarus Prezidenti Aleksandr Lukaşenkonun hərbi hərəkətləri dayandırmaq və gərginliyi azaltmaqla bağlı təklifini qəbul edib.

Rusiya Federal Təhlükəsizlik Xidməti Yevgeni Priqojinə qarşı silahlı üsyana təhrik faktı üzrə cinayət işi açıb. İyunun 27-də isə Federal Təhlükəsizlik Xidməti silahlı qiyamla bağlı başlanmış cinayət işinə xitam verildiyini elan edib.

Bundan sonra özünün qəddarlığı ilə seçilən “Cənab Armegeddon” ləqəbli S. Surovikinin həbs edildiyi iddia olunub. Kreml hələ ki, məsələyə münasibət bildirməyib.

Nigar