"Sənə Poladın qanını gətirdim!"
"Vətən müharibəsi"ndə Şəhidlik zirvəsinə ucalan qəhrəmanlarımızdan biri də Xüsusi Təyinatlı Qüvvələrin zabiti, qərargah rəisinin müavini, Kapitan Elçin Ismayılovdur.

Sonxeber.az yaxınlarının dili ilə şəhidin kiçik həyat hekayəsini izləyicilərlə bölüşür:

"Elçin Ismayılov 30 May 1989-cu ildə Ucarda dünyaya göz açıb. O 1995-ci ildə Ucar rayonunda 1 saylı orta məktəbə gedib və 2006-ci ildə həmin məktəbi bitirərək Azərbaycan Ali Hərbi Məktəbinə qəbul olub.

2010-cu ildə Azərbaycan Ali Hərbi Məktəbini bitirib və Zabitlərin təkmilləşdirilmə kursuna daxil olub və oranı "Əla" nəticə ilə bitirib. Sonra N sayli hərbi hissəyə xidmətə yollanır. Həmin hərbi hissədə bir müddət işlədikdən sonra könüllü olaraq Xüsusi Təyinatlı Qüvvələrə öz adını yazdırır. Xüsusi Təyinatlı Qüvvələrin seçim mərhələsindən 300 nəfərdən 19 nəfər uğurla keçib, və həmin 19 nəfərdən biri də Elçin idi.

Qəhrəman hərbçimiz 2015-ci ilin Fevral ayında Qazax və Ağstafa istiqamətindəki döyüşlərdə, 2016-cı ildə isə Talış kəndi istiqamətində gedən döyüşdə (Aprel döyüşlərində) fəal iştirak edib.
"Vətən müharibəsi" başlayanda Elçin də silahına sarılır.

İlk olaraq Murovdağ zirvəsinin fəthində fəal iştirak edir. Daha sonra Cəbrayıl rayonunun işğaldan azad olunması üçün vuruşur. Cəbrayıl şəhəri azad ediləndən sonra Elçin ilk bayraq sancan oğullarımlzdan olur. Erməni ordusunun 23 zabitini tək başına, ümumilikdə isə 200-dən çox erməni hərbçisini və çox sayda döyüş texnikasını məhv edir. Erməni polkovnikinin qulağına ""Poladın qısasını aldım!" deyərək məhv edir.

Elçin Murovdağ, Cəbrayıl, Kəlbəcər və Füzuli istiqamətində gedən döyüşlərdə fəal iştirak edərək qəhrəmanlıq göstərib. Qəhrəmanımız məhz toy gününə təsadüf edən tarixdə - 7 Oktyabrda Füzuli istiqamətində gedən döyüşlərdə döyüş yoldaşlarını, idarə etdiyi qrupu xilas edib, snayper gülləsinə tuş gələrək qəhrəmancasına şəhidlik zirvəsinə ucalır.
Ucar rayon Şəhidlər Xiyabanında dəfn edilir.

Ölümündən sonra "Vətən uğrunda", "Kəlbəcərin azad olunmasına görə" və "Cəbrayılın azad olunmasına görə" medalları ilə təltif olunur.
Elçin ailəli idi. Ömər və Mübariz adında iki övladı bizə əmanət qaldı.

Allah bütün Şəhidlərimizə rəhmət eləsin. Məkanın cənnət olsun, Cənab Kapitan. Elçin Ismayılov Azərbaycandır!"