Azərbaycan Lideri Dublində bu sənədə İMZA ATDI:Detallar AÇIQLANIR

SİYASƏT

13.11.2026, 20:09

Xəbərlərimizi Google-da izləyin

Yeniliklərdən dərhal xəbərdar olun

Araşdırmaçı yazar, CASCFEN İdarə heyətinin üzvü Əkbər Qoşalı Dublində keçirilən görüşlərlə bağlı Oxu24.com-a açıqlama verib.

O bildirib ki, Azərbaycan Prezidenti İlham Əliyevin Dublində keçirilən Avropa Siyasi Birliyinin IX Zirvə Toplantısında iştirakı, çoxsaylı ikitərəfli görüşləri, onun fikrincə, iki istiqamət üzrə xüsusi diqqət tələb edir: Böyük Britaniya ilə münasibətlərin rəsmən strateji tərəfdaşlıq səviyyəsinə yüksəldilməsi və Ermənistanla sülh gündəliyinin konkret iqtisadi, yükdaşıma və təhlükəsizlik məsələləri müstəvisində davam etdirilməsi.

Birinci istiqamətə toxunan Ə.Qoşalı qeyd edib ki, Prezident İlham Əliyevlə Baş nazir Endi Börnhemin imzaladığı Strateji Tərəfdaşlıq haqqında Birgə Bəyannamə 30 ildən artıq əməkdaşlıq təcrübəsinin yeni çağırışlara uyğunlaşdırılmasıdır. Onun sözlərinə görə, Bəyannamə həm də enerji sahəsində formalaşmış tərəfdaşlığın müdafiə və təhlükəsizlik, yüksək texnologiyalar, süni intellekt, təhsil, innovasiya, ticarət və yatırım yönlərində genişləndirilməsi niyyətinin rəsmi, yüksək ifadəsidir.

Araşdırmaçı yazar vurğulayıb ki, Böyük Britaniya Azərbaycanın enerji sektorunda çoxillik tərəfdaşıdır və Avropadan ölkəmizə yatırımlar baxımından aparıcı mövqeyə malikdir: “İndi isə tərəflər ənənəvi enerji əməkdaşlığından daha geniş iqtisadi və texnoloji işbirliyinə keçmək niyyətlərini ortaya qoyur. Birgə Bəyannamədə Orta dəhlizin inkişafına, yaşıl enerji keçidinə, müdafiə və təhlükəsizlik sahəsində işbirliyinə, habelə dövlətlərin suverenliyi və ərazi bütövlüyü prinsiplərinə verilən önəm də ayrıca məna daşıyır”.

Ə.Qoşalı sənədin siyasi çəkisini artıran cəhətlərdən birinin də orada Azərbaycan–Ermənistan sülh prosesinə dəstəyin öz əksini tapması olduğunu bildirib: “Beləliklə, Londonla strateji tərəfdaşlıq gündəliyi Güney Qafqazda sülh və bağlantılar perspektivi ilə də əlaqələndirilir”.

Dublin səfərinin ikinci önəmli istiqamətinin Prezident İlham Əliyevlə Baş nazir Nikol Paşinyanın görüşü olduğunu deyən Ə.Qoşalı qeyd edib ki, Vaşinqton anlaşmalarından sonrakı mərhələdə aparılan müzakirələr sülh gündəliyinin artıq yalnız siyasi bəyanatlar və diplomatik niyyətlərlə məhdudlaşmadığını göstərir: “Sərhədlərin delimitasiyası, Zəngəzurdan keçəcək marşrut, dəmir və avtomobil yolları, iqtisadi-ticari bağlantılar, elektrik şəbəkələrinin birləşdirilməsi, transsərhəd suların idarə olunması kimi məsələlər sülhün gündəlik həyata təsir göstərə biləcək praktik məzmununu önə çıxarır”.

Azərbaycan ərazisindən Ermənistana ötən ilin noyabrından bəri 105 min ton yük daşınması barədə rəsmi bilgini də diqqətəlayiq hesab edən Ə.Qoşalı bildirib ki, yalnız savaşın bitməsi sülh sayılmır: “Sülh – qarşılıqlı məsuliyyətin, güvənin və dinc yanaşıyaşayışın işlək mexanizmlərlə möhkəmləndirilməsidir. Bununla belə, davamlı sülhün təminatı əldə olunan anlaşmaların ardıcıl, qarşılıqlı şəkildə yerinə yetirilməsindən asılı olacaq”.

O, Dublində Ukrayna Prezidenti Volodimir Zelenski ilə görüşdə üstünə Gün doğmuş Qarabağ və Zəngəzurun gündoğarındakı savaşsonrası bərpa təcrübəsinin müzakirəsini, digər Avropa dövlətlərinin, beynəlxalq qurumların rəhbərləri ilə enerji, bağlantılar və işbirliyi məsələlərinə dair təmasları da səfərin çoxşaxəli məzmununu tamamlayan məqamlar kimi qiymətləndirib.

Açıqlamanın sonunda siyasi-fəlsəfi qənaətini bölüşən Ə.Qoşalı bildirib ki, diplomatiyanın gücü yeni tərəfdaşlar qazanmaqla yanaşı, mövcud münasibətləri yeni məzmunla zənginləşdirməkdə, sülhü isə praktik münasibətlər sisteminə daşımaqda görünür: “Dublində bir tərəfdən dünyanın aparıcı siyasi-iqtisadi güclərindən biri ilə strateji tərəfdaşlığın yeni mərhələsi rəsmiləşdirilir, digər tərəfdən Güney Qafqazda sülhün konkret mexanizmləri müzakirə olunur. Bunlar ayrı-ayrı diplomatik hadisələr olsa da, Azərbaycanın təhlükəsizlik, iqtisadi inkişaf və beynəlxalq bağlantılar maraqları baxımından bir-birini tamamlayan istiqamətlərdir”.

“Dövlətlərin diplomatik coğrafiyası genişləndikcə milli maraqlarının koordinatları itməməlidir. Dublin səfərinə Bakıdan baxanda görünən əsas məna da, məncə, budur: fərqli görüşlər, müxtəlif platformlar, lakin eyni dövlətçilik istinad nöqtəsi! Dövlətimiz zaval görməsin!” – deyə o əlavə edib.

Turan Etibaroğlu

Həmçinin oxuyun