"Mən həmin Şakir kişinin qızıyam" - Jurnalistlə müsahib arasında maraqlı hadisə

Xocalı Soyqırımı baş verən zaman erməni vəhşiliyindən yaxa qurtarıb xilas olmağı bacaran  Xocalı sakinlərinə ilk qucağı Ağdam və ağdamlılar açmışdı.

 

Oxu24.com  həmin gecə baş vermiş  hadisəni təqdim edir:

 

Faciə vaxtı bir çox Xocalı sakini kimi Məmməd həkimin ailəsi, doğmaları da o dəhşətin törədildiyi vaxt Ağdama, Şakir Alışovun evinə gəlirlər.

 

 Yadımdadır, biz uşaq olanda anamın layla və nağılı Ağdamda yaşadıqlarımızdan, Xocalı faciəsindən, bir sözlə ermənilərin azərbaycanlıların başına gətirdikləri müsibətlərdən ibarət olurdu. Xatırlayıram o vaxt anam ürək yanğısı ilə danışırdı ki, Xocalıdan Ağdama pənah gətirən və bir müddət qonaqlarımız olan Xocalı sakinləri vardı.

 

Şakir kişinin ailəsi 

 Yaddaşımın xatirə boxçasının bir küncündə isə, o da qalmışdı ki, qonağımızın biri həkim olub. Adı isə Məmməd olub. 

Düz 33 ildən sonra, qan yaddaşımız haqqında əsir olmuş Xocalı sakinindən müsahibə götürərkən, müsahibim söhbət əsnasında Məmməd həkimin adını çəkdi. Təsadüf nəticəsində həmin qonağımızla, Məmməd həkimlə danışmaq qismət oldu.

Əsirlikdən sonra hara pənah gətirdiniz sualıma isə, həkim Ağdama deyə cavab verdi. Onu da əlavə etdi ki, özümü bağışlaya bilmirəm ki, niyə həmin ailə ilə əlaqəmiz itdi. Mənsə bildirdim ki, bizim evdə sizdən çox söhbət gedib. Mənim sizinlə həmsöhbət olmağım da, təsadüfi deyil, mən həmin Şakir kişinin qızıyam. 

Həkim isə o dəhşətli günləri, əsirlikdən sonra bizə getməyini, Ağdamdakı yaşadıqlarını unutmadığını, ailəmizdən tez-tez, xüsusən də faciə ərəfəsində söhbət açıldığını bildirdi.

Soyqırım şahidinin o gecəyə aid dedikləri hər kəliməsi isə tarixi bir qeyddir. Və mən bu qeydləri aparmağı özümə borc bildim. 

Respublikanın əməkdar fəxri həkimi, eyni zamanda "ƏLİF" qəhrəmanlıq mükafatına layiq görülmüş N.Məmməd həm də, 1996-ci ildə Ulu öndər Heydər Əliyevlə görüşü zamanı Azərbaycan Bayrağı Ordeni ilə təltif olunub. 

Həmin vaxt Ulu öndərimiz H. Əliyevə Xocalı ilə bağlı dilə gətirdiyi arzuları isə, onun oğlu- ata vəsiyyətini dönmədən yerinə yetirən müzəffər sərkərdəmiz həyata keçirdi.  Məmməd həkimin də dediyi kimi:

"Evindən didərgin düşmüş biz məcburi köçkünlər heç zaman ümidsiz olmamışıq. Çünki hər zaman Ali Baş Komandanımıza, Müzəffər ordumuza inanmışıq. Bilirdik ki, bu qisas qiyamətə qalmayacaq. Elə də oldu".

Bəli, Azərbaycan xalqı üçün, uzun illərdən bəri həsrətində olduğu qisas məqamı yetişdi... Durmaq, yarı yolda dayanmaq olmazdı. Durmadıq ,dayanmadıq. İşğalçı quldur dəstələrini heydən düşənə qədər, iti qovan kimi qovaraq, yalvaranadək ədalətli şərtlərlə sülhə məcbur etdik. Bununla da qələbə həsrəti ilə alışıb yanan ürəklərimizə su səpdik...  Qələbəmiz davamlı, torpaqlarımız azad, müstəqilliyimiz isə əbədi olsun.   

       

     Pərvin SAKİRQIZI