"Azərbaycanda genetikası dəyişdirilmiş meyvə-tərtəvəzlər yoxdur. Ölkəmizdə yetişdirilmir və gətirilməsi də qadağandır. Belə bir şeyə ehtiyac da yoxdur, çünki bizim iqlimimiz məhsulların normal şəkildə yetişdirilməsinə imkan verir".

Bunu Redaktor.az-a açıqlamasında qida mühəndisi İsa Əliyev deyib. O bildirib ki, meyvələrə vurulan kimyəvi maddələr insanlarda hormon dəyişikliyinə səbəb ola bilər. Hormon dəyişikliyi isə çox vaxt cinsi oryentasiyanın dəyişməsinə gətirib çıxarır.

"Məhsulları bir az daha tez yetişdirmək və bazara çatdırmaq üçün çox vaxt hormonlardan və hibrid toxumlardan istifadə olunur. Hormonlardan Azərbaycan standartlarının verdiyi ölçüdə istifadə eləmək problem deyil. Təəssüf ki, çox vaxt hormonlardan geniş istifadə olunur. Belə məhsullar insan orqanizmi və sağlamlığı üçün ciddi təhdiddir. Çünki hormonal dəyişikliklərə səbəb ola bilir".

Qida mütəxəssisi bu məsələdə insanları diqqətli olmağa çağırıb:

"Bəzən marketdən aldığınız almaların üzünü qazıdığımız zaman ağ rəngdə bir maddə görə bilərik. Bu ağ rəngli maddə kimyəvi dərmandır. Bir çox hallarda bu kimyəvi dərmanlar meyvələri qurdlardan və ya xarici mikroorqanizmlərdən, bakteriyalardan qoruyur ki, onlar heç bir şəkildə çürüməsin. Bundan əvvəlki dövrlərdə almanı kəsdikdən sonra qaralardı. İndiki almalarda isə qaralmalar çox gec olur. Səbəbi onlarda olan dəmir əskikliyidir. Tətbiq olunan kimyəvi dərmanlar almanın tez yetişməsinə, tez böyüməsinə gətirib çıxarır. Alma özü yetişmiş olsa da, mineral və vitaminlər cəhətdən çox zəif olur".