Bir gecədə 1746 insanı səssizcə öldürən “ölüm gölü” – Nyos faciəsi

MARAQLI

545

14.04.2026, 21:18

1986-cı ildə Kamerunda baş verən hadisə dünya elmini şoka salmış ən qeyri-adi təbii fəlakətlərdən biri kimi tarixə düşüb. Kamerunun Nyos gölü ətrafında yerləşən kəndlərdə insanlar adi gün kimi yatdıqları gecədən sonra bir daha oyanmayıblar.

Oxu24.com xəbər verir ki,hadisə zamanı nə partlayış, nə zəlzələ, nə də sunami qeydə alınıb. Kəndlərdə insanlar, heyvanlar və quşlar yataqlarında və olduqları yerlərdə həyatlarını itiriblər. Göl ətrafında təxminən 25 kilometrlik ərazidə demək olar ki, bütün canlılar məhv olub.

Mütəxəssislərin araşdırmalarına görə, Nyos gölü sönmüş vulkan krateri üzərində yerləşir və onun dərinliyində uzun illər ərzində karbon qazı (CO₂) toplanıb. Gölün laylı və qarışmayan su strukturu qazın səthə çıxmasının qarşısını alıb və nəticədə qaz dərinlikdə “yığılıb qalıb”.

1986-cı il avqustun 21-də baş verən təbii tarazlıq pozuntusu nəticəsində bu qaz kütləvi şəkildə səthə çıxıb. Havadan ağır olan karbon qazı sürətlə vadilərə yayılaraq aşağı əraziləri bürüyüb. İnsanlar yuxuda ikən oksigensiz qaldıqları üçün boğularaq həyatlarını itiriblər.

Hadisə nəticəsində 1700-dən çox insanın öldüyü, həmçinin bütün canlı həyatının ciddi şəkildə zərər gördüyü bildirilir. Nyos gölü bu gün də “limnik püskürmə” kimi tanınan nadir və təhlükəli təbiət hadisəsinin ən məşhur nümunələrindən biri hesab olunur.

Nigar

Həmçinin oxuyun