Həbs olunduğu deyilən iş xanımından şok açıqlama:"Zaur Baxşəliyevdən prokurorluğa şikayət etmişəm"

 Baku.ws saytı  Bakıda xanım iş adamının saxlanması  barədə  məlumat yayıb. Saytın yaydığı  məlumata  görə, Bakıda fəaliyyət göstərən "Mak Marin LTD" şirkətinin təsisçisi və rəhbəri Mətanət Süleymanzadə saxlanılıb.

Sayt  iddia   edib  ki, şirkət rəhbəri işə düzəltmək adı ilə yüzlərlə insanın pulunu mənimsəməkdə günahlandırılır.

Mediada  yayılan  məlumatlarla  bağlı  sözügedən  şirkətin  rəhbəri  Mətanət  Süleymanzadə  oxu24.com  saytına  zəng  edərək  açıqlama verib.

O, bildirib  ki, yayılan  məlumat  həqiqəti  əks  etdirmir  və ona  heç  bir  cinayət  işi  açılmayıb  və  polisə  də dəvət  edilməyib.

Mətanət  Süleymanzadə hadisənin  şok  təfərrüatını açıqlayıb.

"Dünən  ATV telekanalında  mənimlə  bağlı araşdırma aparılmadan   sujet yayımlanıb. Efirə  gələn  iki  nəfər  şəxs  bildirib  ki, guya  mən  onlardan  pul  alıb, işə düzəltmədən onları aldatmışam. Verilişin  aparıcısı Zaur Baxşəliyev araşdırma aparmadan mənim  əleyhimə  orada  həmin  insanların  çıxış  etməsinə  şərait yaradıb.

Həmin  sujet  efirə   getdikdən  sonra  mənə  çoxsaylı  zənglər  gəldi. Mənə  şər atıldığını  gördüyüm  üçün  özümə  xəsarət  yetirdim  və  Nərimanov  Rayon  Prokurorluğuna  rəsmi  ərizə  ilə Zaur  Baxşəliyevdən   və  mənim  keçmiş əməkdaşlarımdan  şikayət  etdim.Onlar mənim  adımdan  istifadə  edərək  bir  neçə vətəndaşdan  pul  alıbmış. Mənim  bundan  xəbərim  olmayıb. Bu kimi qanunsuz əmələ yol  verdiyi  üçün  əməkdaşlardan  şikayət  vermişəm. Həmçinin ATV-nin aparıcısı  Zaur Baxşəliyev  mənim haqqımda həqiqətə uyğun olmayan  informasiyanı  efirə  verdiyi  üçün  rəsmi  şikayət  etmişəm. İndi də araşdırma gedir."

 

Qeyd  edək  ki,   "Mak Marin LTD” şirkəti 01.05.2019 tarixində qeydiyyata alınıb. Qanuni təmsilçi  olaraq Həsənova Mətanət Zahir qızı göstərilir. Şirkət Bakı şəhəri, Nərimanov rayonu, Təbriz küçəsi ev 36, mənzil 6 ünvanında qeydiyyata alınıb. Faktiki olaraq Əlyar Əliyev küçəsi 69 ünvanında fəaliyyət göstərirdi. 

M.Süleymanzadə yerli mediada yetərincə tanınmış simadır. İndiyədək bir neçə mükafata layiq görülüb.