Xəbəriniz olmadan adınıza borc yazılıbsa, nə etməlisiniz? – Vəkildən XƏBƏRDARLIQ

HÜQUQ

186

31.08.2026, 17:16

Xəbərlərimizi Google-da izləyin

Yeniliklərdən dərhal xəbərdar olun

Son zamanlar vətəndaşların xəbəri olmadan adlarına müxtəlif borc öhdəliklərinin və ya kredit müqavilələrinin rəsmiləşdirilməsi hallarında artım müşahidə olunur. Bir çox hallarda şəxslər yalnız adlarına hesablanmış faizlər, məhkəmə qərarları və ya icra qərarları ilə qarşılaşdıqda baş verənlərdən xəbərdar olurlar. Qanunsuz olaraq başqasının şəxsiyyət məlumatlarından istifadə edilməsi və ya sənədlərin saxtalaşdırılması ciddi hüquqi pozuntu hesab edilir. Belə xoşagəlməz hallarla qarşılaşan vətəndaşların hansı adımları atmalı olduğu, hansı dövlət qurumlarına müraciət etməli olduğu xüsusi maraq doğurur. Hüquqi müstəvidə bu tür borc öhdəliklərinin ləğv edilməsi və ədalətin bərpası üçün dəqiq prosedur mövcuddur. İddia olunan borcun həqiqətən də vətəndaşa aid olmadığını sübut etmək üçün xüsusi ekspertizaların keçirilməsi tələb oluna bilər. Şəxsin iştirakı və razılığı olmadan tərtib edilən hər bir maliyyə sənədi hüquqi gücünü itirmək riskı daşıyır. Yaranmış problemlərdən vaxtında və düzgün yolla xilas olmaq üçün hüquqi savadlılıq vacib şərtdir. Mövzu ilə bağlı Oxu24.com-a açıqlama verən vəkil Mehman Muradlı məsələnin hüquqi tərəflərini şərh edib.

Vəkil bildirib ki, borc münasibətlərinin rəsmiləşdirilməsi qanunla müəyyən edilmiş qaydada icra olunmalıdır:

"Ümumiyyətlə, borc münasibəti notarial qaydada təsdiqlənən bir əməliyyatdır. Notariat qaydasında borc müqaviləsi təsdiq edilərkən həmin şəxsin – yəni borc alan və ya öhdəlik götürən tərəfin – şəxsən iştirakı mütləqdir və vacib şərtdir”.

Onun sözlərinə görə, əgər vətəndaş notariat kontorunda şəxsən iştirak etmirsə, onun xəbəri və razılığı olmadan adından hər hansı borc rəsmiləşdirilə bilməz və hüquqi baxımdan belə bir borc münasibəti yaranmış sayılmır.

Mehman Muradlı qeyd edib ki, əgər hansısa formada vətəndaşın xəbəri olmadan onun adına borc sənədi tərtib edilibsə, bu artıq ciddi qanunsuzluqdur və birbaşa cinayət məsuliyyəti yaradır.

O xəbərdarlıq edib ki, belə hallar baş verdikdə məsələ hüquq-muhafizə orqanları tərəfindən geniş araşdırılmalıdır:

“Vətəndaş adında saxta borc rəsmiləşdirildiyini öyrəndikdə dərhal hüquq-mühafizə organlarına və məhkəməyə müraciət etməlidir. Araşdırma zamanı imza ekspertizası (xattşünaslıq ekspertizası) təyin olunur və sənəddəki imzanın vətəndaşa aid olmadığı sübuta yetirilir. Bu yolla həm saxta borc öhdəliyi ləğv edilir, həm də sənədləri saxtalaşdıran şəxslər qanun qarşısında cavabdehlik daşıyırlar”.

Çimnaz Telmanqızı

Həmçinin oxuyun