Arzum999 işi: Yenidən həbs tələbi verilə bilər?

HÜQUQ

27.07.2026, 14:34

Ötən həftə "Arzum 9999" ləqəbli bloger İlduzə Hacıyeva ev dustaqlığına buraxılıb. Məhkəmə təqsirləndirilən şəxsin 4 azyaşlı övladının olmasını, onlardan birinin ağır autizmdən əziyyət çəkməsini nəzərə alaraq həbs qətimkan tədbirini dəyişib. Bu qərardan sonra ictimaiyyətdə "qarşı tərəf yenidən onun həbs olunmasını tələb edə bilərmi?" sualı geniş müzakirə olunur.

Oxu24.com-a açıqlama verən vəkil Elvin Əliyev bildirib ki, Azərbaycan Respublikasının Konstitusiyası hər bir vətəndaşa məhkəməyə müraciət etmək hüququ verir və bu hüquq heç bir halda məhdudlaşdırıla bilməz.

Onun sözlərinə görə, istənilən şəxs qanunvericiliyin verdiyi imkanlardan istifadə edərək məhkəməyə müraciət edə və müxtəlif vəsatətlər qaldıra bilər. Bu isə o demək deyil ki, irəli sürülən hər bir tələb mütləq təmin olunacaq.

Vəkil qeyd edib ki, son dövrlərdə xüsusilə rezonans doğuran yol-nəqliyyat hadisələri və digər cinayət işləri üzrə cəmiyyətdə müxtəlif fikirlər səsləndirilir. Bəzən vəkillər və hüquqşünaslar qanunvericiliyə əsaslanaraq hüquqi mövqelərini ifadə etdikdə, zərərçəkmiş və ya təqsirləndirilən tərəfin yaxınları bunu şəxsi münasibət kimi qəbul edirlər. Halbuki hüquqşünasın vəzifəsi emosiyalarla deyil, qanunun tələbləri ilə çıxış etməkdir.

Elvin Əliyev bildirib ki, hüquqi qiymətləndirmə apararkən yalnız məhkəmə materialları, sübutlar və qanun normaları əsas götürülməlidir. Sosial şəbəkələrdə yayılan məlumatlar və ya emosional yanaşmalar hüquqi nəticə hesab edilə bilməz.

Vəkilin sözlərinə görə, rezonans doğuran cinayət işlərini bütün hüquqşünaslar kimi o da izləyir. Həm müdafiə tərəfinin, həm də ittiham tərəfinin qaldırdığı vəsatətlər məhkəmə tərəfindən araşdırılır. Lakin məhkəmənin həmin vəsatətləri təmin edib-etməməsi tamamilə onun səlahiyyətindədir.

O vurğulayıb ki, hər hansı vəsatət rədd edilərsə, məhkəmə bunun səbəbini əsaslandırmağa borcludur.

"Hüquqi dövlət prinsiplərinə görə müdafiə tərəfinin qaldırdığı vəsatət təmin edilmədikdə məhkəmə qərarında bunun hüquqi əsasları göstərilməlidir. Sadəcə "təmin olunmur" demək kifayət etmir. Məhkəmə izah etməlidir ki, vəsatətdə göstərilən halların işin hallarına aidiyyəti yoxdur və ya qanunvericilik baxımından əsaslı hesab edilmir", – deyə vəkil bildirib.

Elvin Əliyev əlavə edib ki, məhkəmələrin qəbul etdiyi bütün qərarların mütləq doğru və dəyişdirilməz olduğunu söyləmək də düzgün deyil.

Onun sözlərinə görə, məhz buna görə apellyasiya instansiyası fəaliyyət göstərir. Birinci instansiya məhkəmələrinin çoxsaylı qərarları Apellyasiya Məhkəməsi tərəfindən ləğv edilir və ya dəyişdirilir. Eyni qaydada Ali Məhkəmə də apellyasiya instansiyasının qərarlarını ləğv edə və ya dəyişə bilir.

Bu baxımdan hər bir məhkəmə qərarı yuxarı instansiyada yenidən hüquqi qiymətləndirilə bilər.

Vəkil bildirib ki, konkret cinayət işi üzrə bütün materiallarla tanış olmadan tərəflərdən hansının tam haqlı və ya haqsız olduğunu söyləmək mümkün deyil.

"Biz yalnız açıq məhkəmə iclaslarında səsləndirilən məlumatları, müdafiə tərəfinin vəsatətlərini və ictimaiyyətə açıqlanan faktları görürük. İş materiallarının tam məzmunu məhkəmənin sərəncamındadır. Buna görə də kənardan qəti hüquqi nəticə çıxarmaq düzgün olmaz", – deyə o qeyd edib.

İlduzə Hacıyeva ilə bağlı verilən ev dustaqlığı qərarından sonra yenidən həbs qətimkan tədbirinin seçilməsi ilə bağlı vəsatət verilməsinin mümkün olub-olmamasına gəlincə, vəkil bildirib ki, qanun buna müraciət etmək hüququ verir.

Onun sözlərinə görə, istənilən tərəf qanunvericiliyin nəzərdə tutduğu qaydada yeni vəsatət qaldıra, məhkəməyə müraciət edə və qərardan şikayət verə bilər. Lakin həmin müraciətin təmin edilib-edilməməsi yalnız məhkəmənin təqdim olunan sübutlar və hüquqi əsaslar əsasında verəcəyi qərardan asılıdır.

Elvin Əliyev vurğulayıb ki, cinayət prosesində tərəflərin hüquqları geniş şəkildə qorunur və hər bir şəxs qanunvericiliyin imkan verdiyi bütün instansiyalara müraciət edə bilər.

"Qanunvericilik imkan verirsə, tərəflər Apellyasiya Məhkəməsinə, Ali Məhkəməyə, zərurət yarandıqda isə Konstitusiya Məhkəməsinə qədər müraciət edə bilərlər. Hətta ittiham tərəfi hesab edərsə ki, təyin olunmuş cəza yüngüldür, onun daha ağırlaşdırılması ilə bağlı da müvafiq qaydada müraciət etmək hüququna malikdir. Bu hüquq heç kimin əlindən alına və ya məhdudlaşdırıla bilməz. Ancaq son qərarı yenə də yalnız məhkəmə qəbul edir", – deyə vəkil əlavə edib.

Hüquqşünas sonda qeyd edib ki, məhkəmə qərarlarının taleyi yalnız qanuni sübutlar və hüquqi əsaslar əsasında müəyyən edilir və ictimai müzakirələr məhkəmənin qərarını əvəz etmir.

Həmçinin oxuyun