Vəkil: Müdafiə tərəfi şahid ifadələrini mübahisələndirə bilər  

Azərbaycan qanunvericiliyi cinayət prosesində iştirak edən şəxslərin hüquqlarının qorunmasına xüsusi önəm verir. Bu hüquqlardan biri də şübhəli və ya təqsirləndirilən şəxsin onun əleyhinə ifadə vermiş şəxsləri məhkəmə araşdırması zamanı dindirmək hüququdur.

Bu barədə Oxu24.com-a açıqlama verən vəkil Elvin Səfərov bildirib ki, bir çox vətəndaşlar cinayət prosesində müdafiə tərəfinin malik olduğu hüquqlardan tam məlumatlı olmurlar. Halbuki qanun hər bir şübhəli və ya təqsirləndirilən şəxsə öz müdafiəsini təşkil etmək üçün geniş imkanlar yaradır.Cinayət mühakimə icraatının əsas prinsiplərindən biri tərəflərin bərabərliyi və çəkişmə prinsipidir. Bu prinsipə əsasən, ittiham tərəfi öz mövqeyini sübut etməyə çalışdığı kimi, müdafiə tərəfi də həmin sübutları araşdırmaq, onlara münasibət bildirmək və zərurət yarandıqda onları şübhə altına almaq hüququna malikdir.

“Elə hallar olur ki, istintaq və ya məhkəmə araşdırması zamanı müəyyən şəxslər təqsirləndirilən şəxsin əleyhinə ifadələr verirlər. Lakin həmin ifadələrin məzmununun düzgünlüyünün yoxlanılması, onların hansı şəraitdə verildiyinin araşdırılması və ziddiyyətlərin üzə çıxarılması üçün təqsirləndirilən şəxsin və onun müdafiəçisinin həmin şahidlərə suallar vermək hüququ var. Bu, qanunla təsbit olunmuş fundamental müdafiə hüquqlarından biridir”, – deyə Elvin Səfərov vurğulayıb.

Vəkil qeyd edib ki, məhkəmə araşdırmasının məqsədi yalnız ittihamı təsdiqləmək deyil, obyektiv həqiqəti müəyyən etməkdir. Buna görə də məhkəmə prosesində həm ittiham tərəfi, həm də müdafiə tərəfi şahidlərin dindirilməsində iştirak edə, onlara suallar ünvanlaya və ifadələrin etibarlılığını qiymətləndirməyə çalışa bilər. Avropa İnsan Hüquqları Konvensiyası və milli qanunvericilik də bu hüququ müdafiə edir. Belə ki, şəxs onun əleyhinə ifadə vermiş şahidlərlə üzləşmək və həmin şəxsləri sorğu-sual etmək imkanına malik olmalıdır. Bu hüquq ədalətli məhkəmə araşdırmasının vacib elementlərindən biri hesab edilir.

“Elə vəziyyətlər olur ki, şahid ifadələri iş üzrə əsas sübutlardan biri kimi təqdim edilir. Məhz buna görə müdafiə tərəfinin həmin şahidləri dindirmək imkanı əldə etməsi mühüm əhəmiyyət daşıyır. Çünki bəzən ifadələr arasında ziddiyyətlər ortaya çıxır, bəzən isə şahidin hadisə barədə məlumatının məhdud olduğu müəyyən edilir. Bütün bunlar məhkəmənin obyektiv qərar qəbul etməsinə təsir göstərə bilər”, – deyə vəkil bildirib.

Elvin Səfərov əlavə edib ki, vətəndaşlar cinayət prosesində öz hüquqlarını bilməli və qanunla onlara verilən imkanlardan istifadə etməlidirlər. Onun fikrincə, hüquqlar barədə məlumatlı olmaq həm müdafiənin effektiv təşkilinə, həm də ədalətli məhkəmə araşdırmasının təmin edilməsinə xidmət edir.Şübhəli və ya təqsirləndirilən şəxsin onun əleyhinə ifadə vermiş şəxsləri məhkəmə istintaqı zamanı dindirmək hüququ qanunun təmin etdiyi mühüm təminatlardan biridir və bu hüququn həyata keçirilməsi ədalət mühakiməsinin vacib tərkib hissəsi hesab olunur.

Jalə 

Həmçinin oxuyun

Dekabrda neçə gün iş olmayacaq? 

Əsgərimiz qəfil HƏYATINI İTİRDİ

Bakıya nə zaman qar yağacaq? – AÇIQLAMA 

400 manatdan 1 000 manata qaldırılır   —  2027-ci ildən TƏTBİQ OLUNACAQ