Dələduzluq işi üzrə istintaqa çağırılanlar nələrə diqqət etməlidir? — Vəkildən VACİB AÇIQLAMA  

Son dövrlərdə vətəndaşlar arasında ən çox rast gəlinən hüquqi problemlərdən biri də dələduzluq cinayəti ilə bağlı ittihamlardır. Bir çox hallarda, şəxslər heç bir cinayət niyyəti olmadan hər hansı bir iş və ya ticarət məqsədilə pul vəsaiti əldə edir, lakin müəyyən obyektiv və ya subyektiv səbəblərdən bu işi tamamlaya bilmirlər. Belə vəziyyətlərdə qarşı tərəfin şikayəti əsasında məsələ cinayət müstəvisinə keçir və şəxs istintaqa çağırılır. Təcrübə göstərir ki, vətəndaşlar hüquqi biliklərinin yetərsizliyi və ya daxili narahatlıq səbəbindən istintaqın ilkin mərhələsində gələcək müdafiə taktikalarını çətinliyə salan ciddi səhvlərə yol verirlər.

Oxu24.com olaraq mövzunun aktuallığını və vətəndaşların hüquqi maariflənməsinin vacibliyini nəzərə alaraq, bu istiqamətdə qarşıya çıxan əsas nüansları araşdırmışıq. İstintaq prosesində özünü müdafiə etmək, hüquqları düzgün qorumaq və ifadə verərkən nələrə diqqət yetirmək lazım olduğu barədə suallarımızı vəkil Elvin Səfərov cavablandırıb.

“Əgər dələduzluq niyyətiniz olmayıbsa, pulu aldığınızı etiraf etməyin"

Vəkil Elvin Səfərov Oxu24.com-a açıqlamasında dələduzluq cinayətləri ilə bağlı istintaqa çağırılan şəxslərin ən çox yol verdiyi səhvlərdən və bunun hüquqi fəsadlarından danışıb:

“Dələduzluq cinayəti ilə bağlı istintaqa çağırılan şəxslərin ən çox yol verdiyi səhv nədən ibarətdir? Hesab edək ki, sizin kiməsə qarşı heç bir dələduzluq niyyətiniz olmadan hər hansı bir pul məbləğini aldığınız bir fakt var və həmin pul məbləği ilə nəsə bir iş görüb alındıra bilməmisiniz. Və siz istintaqa çağırılanda səmimi olaraq istintaqda bildirirsiniz ki, “həmin o pulları almışam”. 

Belə olan halda fikirləşmək lazımdır ki, şikayət edən şəxsin əlində sizə pulun verildiyini təsdiq edən sübut olmaya bilər. Və siz öz ifadənizdə həmin pulun alındığını təsdiq etməklə, özünüzə ziyan etmiş olursunuz”.

Elvin Səfərov qeyd edib ki, pulun alındığı təsdiq olunduqdan sonra ittiham tərəfinin işi daha da asanlaşır:

“Bundan əlavə, pulun alındığı təsdiq olunduqdan sonra ittihamın üzərində yeganə vəzifə ondan ibarət olur ki, sizin bu pulu alarkən hər hansı bir niyyətinizin olub-olmadığını sübut etsin. Bunu da adətən, ibtidai istintaq orqanları sizin əleyhinizə ittiham hazırlayaraq, sizin belə bir niyyətiniz olduğu qənaətinə gələrək qərar verirlər. Və bu nəticədə də sizin məhkəmədə gələcəkdə işinizin müdafiə taktikasının zəifləməsinə xidmət etmiş olur”.

Vəkil vətəndaşlara hüquqi xəbərdarlıq edərək fikrini bu sözlərlə tamamlayıb:

“Buna görə də, ifadə verərkən heç bir formada aldığınız məbləği, əgər dələduzluq niyyətiniz olmamışdırsa, etiraf etməməlisiniz”.

Hazırladı: Nigar

Həmçinin oxuyun

Sentyabrın 15-i bu şəxslərə icazə verilə bilər - 3 SAATLIQ 

TƏCİLİ! Avtomobil aşaraq yanıb, ölən və xəsarət alan var

Coşqun və Ucalın ölümünün şok detalları:200-300 metr aralı olublar -VİDEO

Bu şəxslərə əmək pensiyası xüsusi qaydada təyin olunur – AÇIQLAMA