Softbol üzrə Yaponiyanın qadınlardan ibarət millisinin üzvü Miu Qotonun qazandığı qızıl medal dəyişdiriləcək.

OXU24.COM "Kyodo" agentliyinə istinadən xəbər verir ki, buna səbəb 72 yaşlı merin həmin medalı dişləyərək şəkil çəkdirməsidir. 

Tokio-2020 Olimpiadası bitincə 20 yaşlı idmançı doğma şəhəri Naqoyaya qayıdıb. Softbolçunu ilk olaraq qarşılayanlardan biri şəhərin meri Takasi Kavamura olub. Təbrik ünvanladıqdan sonra Miunun medalını boynuna taxıb dişləyərək xatirə şəkili çəkdirən merin ünvanına 7000-dən çox etiraz məktubu gəlib. Məsələ burasındadır ki, pandemiyanın tüğyan etdiyi bir dövrdə maskanı çıxarıb buna bənzər hərəkətlər etmək qəbulolunmazdır. 

Bu səbədən yerli Olimpiya Komitəsi BOK-dan (Beynəlxalq Olimpiya Komitəsindən) medalın dəyişdirilməsini tələb edib. Komitə buna razılıq verib. Mer bunun üçün bütün xərcləri öz üzərinə götürəcəyini bildirib.

Qeyd edək ki, görüşün sonunda 72 yaşlı mer həm də Miu Qotoya onunla romantik münasibətlərə girməyi təklif edib.