Putin ANONS etdi - Əliyevlə Moskvada görüş baş tuta bilər

DÜNYA

127

09.06.2026, 12:31

İyunun 4-5-də Sankt-Peterburq Beynəlxalq İqtisadi Forumu (SPIEF) çərçivəsində Rusiya Prezidenti Vladimir Putinin Azərbaycanın adını xüsusi vurğulaması və rəsmi Bakıya yönəlik yüksək dövlət təşəkkürü səsləndirməsi qlobal diplomatik kulislərdə böyük əks-səda doğurmaqda davam edir. Forumdakı çıxışı zamanı Kreml rəhbəri “Azərbaycan tərəfi böyük həcmdə effektiv iş gördü, bütün sorğularımıza dərhal cavab verdi. Bu, vəziyyəti yüngülləşdirmək baxımından çox vacib idi” ifadələrini işlədərək rəsmi Bakının regional proseslərdəki rolunu xüsusi qeyd edib. Kremlin beynəlxalq platformalarda digər bir dövlətdən bu formatda və açıq minnətdarlıq ritorikası ilə bəhs etməsi adi diplomatik praktika olmasa da, Putin bu bəyanatı ilə həm Azərbaycana qarşı ictimai təşəkkürünü bildirdi, həm də Moskva ilə Bakı arasında ən ali səviyyədə yeni bir görüş planının anonsunu verdi. Hər iki ölkə prezidenti arasında planlaşdırılan rəsmi görüş haqqında hələlik geniş kütləvi informasiya vasitələrinə dəqiq rəsmi bilgi sızdırılmasa və cari il ərzində liderlər hələlik üz-üzə rəsmi bir rəsmi görüş keçirməsələr də, il boyu ikitərəfli əlaqələri inkişaf etdirmək üçün mütəmadi olaraq intensiv telefon danışıqları aparıblar. Bu yüksək təmas, ilk növbədə, Rusiya üçün həyati dərəcədə strateji xarakter daşıyır; çünki Kreml kəskin dəyişən geosiyasi reallıqlar fonunda Bakı ilə münasibətlərin sabit, etibarlı və proqnozlaşdırılan xətt üzrə davam edəcəyinə tam əmin olmaq istəyir. Moskva üçün Azərbaycanla tərəfdaşlıq yalnız ikitərəfli müstəvidə deyil, bütövlükdə Cənubi Qafqazda öz təsir rıçaqlarının qalıqlarını qorumaq, xüsusilə də regionda ABŞ-ın və Avropa İttifaqının artan hərbi-siyasi fəallığı fonunda balansı qorumaq baxımından müstəsna əhəmiyyət kəsb edir və bu reallıq gözlənilən sammiti yaxın perspektivdə regional güc balansını müəyyən edən əsas amilə çevirir.

Oxu24.com xəbər verir ki,məsələ ilə bağlı NOCOMMENT.az-a danışan professor Qabil Hüseynli qeyd edib ki, Vladimir Putinin Sankt-Peterburq forumunda Azərbaycana bu dərəcədə açıq və yüksək səviyyədə təşəkkür etməsi rəsmi Bakının Ukrayna müharibəsi və Yaxın Şərq böhranı fonunda yürütdüyü balanslı, müstəqil xarici siyasətin böyük diplomatik qələbəsidir:

"Rusiya hazırda Qərbin kəskin sanksiyaları altındadır və xarici ticarət, eləcə də logistika baxımından nəfəsliyə ehtiyac duyur. Azərbaycan isə Şimal-Cənub beynəlxalq nəqliyyat dəhlizinin ən kritik keçid nöqtəsi kimi Moskvanın bütün sorğularına operativ, rasional və beynəlxalq hüquq çərçivəsində cavab verməklə Kremlin iqtisadi təcrid vəziyyətini yüngülləşdirib. Putinin bu təşəkkür bəyanatı həm də Ermənistandakı 7 iyun seçkilərindən dərhal sonraya təsadüf edir. Ermənistanın Qərbə doğru kəskin dönüş etdiyi və Paşinyanın mütləq qələbə qazanaraq ABŞ-ın regional planlarını, o cümlədən TRIPP (Tramp marşrutu) layihəsini rəsmiləşdirdiyi bir vaxtda, Moskva anlayır ki, onun Cənubi Qafqazda tamamilə təkbaşına silinməmək üçün yeganə güvənə biləcəyi və rasional dialoq apara biləcəyi tərəfdaş məhz Azərbaycandır".

Professorun sözlərinə görə, anonsu verilən və yaxın vaxtlarda reallaşması gözlənilən Əliyev-Putin görüşü regionda status-kvonun qorunması və sülh müqaviləsinin şərtlərinin formalaşdırılması baxımından mühüm qərarlarla yaddas qalan olacaq: "Rusiya bu görüş vasitəsilə Bakı ilə strateji müttəfiqlik bəyannaməsinin bəndlərini yenidən təftiş etmək, bölgədə formalaşan ABŞ və NATO fəallığına qarşı Azərbaycanın neytral və balanslı mövqeyini qoruyacağına tam əmin olmaq istəyir. Digər tərəfdən, Azərbaycan öz növbəsində bu görüşdən Zəngəzur dəhlizinin açılması prosesində Rusiyanın üzərinə götürdüyü öhdəlikləri yerinə yetirməsini və regional kommunikasiyaların açılmasına mane olmamağı tələb etmək üçün maksimum yararlanacaq. Rəsmi Bakı heç bir anti-Rusiya koalisiyasında yer almadığını nümayiş etdirməklə yanaşı, öz milli maraqlarını və suverenliyini qətiyyətlə qoruyur. Bu ali səviyyəli dialoq Kremlin Cənubi Qafqazda aqressiv deyil, praqmatik addımlar atmasını təmin edəcək və Qərblə Rusiya arasındakı qlobal rəqabətdə Azərbaycanın sülh adası statusunu daha da möhkəmləndirəcək".

Həmçinin oxuyun