Məhkəmə Gülnarə Kərimova ilə bağlı qərar verdi

Özbəkistanın mərhum birinci prezidenti İslam Kərimovun böyük qızı Gülnarə Kərimova Daşkənd vilayətinin Zəngiata rayonundakı 21 saylı qadın kolonundan 42 saylı ümumi rejimli cəzaçəkmə müəssisəsinə köçürülüb. 

Oxu24.com xəbər verir ki, bu barədə xarici KİV məlumat yayıb. 

"Gülnarə 5-6 çamadanla koloniyadan çıxdı. O, dekabrın 19-da Daşkənd vilayətinin Zəngiata rayon məhkəməsinin qərarı ilə Özbəkistan Cinayət Məcəlləsinin 74-cü (“Cəzanın daha yüngül cəza ilə əvəz edilməsi”) maddəsi əsasında kolondan azad edilib.

Məlumata görə, bu qərar mərhum prezident Kərimovun qızının qaldırdığı vəsatət əsasında verilib. O, qeyd edib ki, Kərimova məhkəmənin təyin etdiyi cəzanın üçdə birini çəkib.

Xatırladaq ki, Gülnarə Kərimova atasının prezidentliyi dövründə Avropada nüfuzlu diplomatik vəzifələrdə çalışıb, böyük sərvət əldə edib.

2013-cü ildə Özbəkistanda Gülnarə Kərimovaya qarşı oğurluq və vergidən yayınma ilə bağlı iki cinayət işi açılıb. O, 2015-ci ildə beş il, ikinci halda isə 2017-ci ildə 10 il müddətinə azadlıqdan məhrum edilib. Sonradan bu cəza beş il müddətinə azadlığın məhdudlaşdırılması ilə əvəz olunub.

2020-ci ilin martında isə Daşkənd Şəhər Məhkəməsi onu sui-qəsd, hədə-qorxu ilə pul tələb etmə, mənimsəmə və soyğunçuluq, çirkli pulların yuyulması və digər cinayətlərdə ittiham edərək 13 il 4 ay müddətinə azadlıqdan məhrum edib. O, 2019-cu ilin yazından Daşkənd vilayətinin Zəngiata rayonundakı 21 saylı qadın kolonunda cəza çəkir.

Kərimova ABŞ və bir sıra Avropa ölkələrində korrupsiya və çirkli pulların yuyulması ilə bağlı oxşar cinayət işlərində iştirak etdikdən sonra Özbəkistanda ona qarşı işlər açılıb. Müstəntiqlərin fikrincə, Kərimova ölkədə mobil rabitə üçün lisenziyaların verilməsi müqabilində telekommunikasiya və digər şirkətlərdən bir milyard dollara yaxın rüşvət alıb.

Sonra o, şərikləri ilə bu pulları ofşor şirkətlər vasitəsilə xaricə aparıb və ondan çox villa və başqa daşınmaz əmlak alıb. Özbəkistan hakimiyyətinin məlumatına görə, Gülnarə Kərimova və onun cinayətkar qrupunun xarici aktivlərinin ümumi məbləği təxminən 1,4 milyard dollar qiymətləndirilir.