Bolqarıstanın Qazprom-a qarşı milyonlarla dollarlıq iddiası

Bolqarıstanın dövlət qaz şirkəti Bulgargaz EAD 2022-ci ildə qaz tədarükü ilə bağlı müqavilənin pozulmasına görə 400 milyon avro (432,76 milyon dollar) məbləğində təzminat tələb edərək "Qazprom Export"la mübahisəni həll etmək üçün arbitraja müraciət edib.

 

Oxu24.com xəbər verir  ki, bu barədə Reuters agentliyi məlumat yayıb.

 

Bolqarıstan şirkəti bazar ertəsi Parisdəki Beynəlxalq Ticarət Palatasında Beynəlxalq Arbitraj Məhkəməsində işə başlayıb, çünki Rusiya şirkəti mübahisəni həll etmək təklifinə cavab vermədi.

“Rusiya tərəfi məsələni məhkəmədən kənar həll etmək üçün tədbirlər görmədikdən sonra Bulgargaz şirkətin maraqlarını qorumaq üçün lazımi addımlar atıb”, - Bulgargaz-ın açıqlamasında deyilir.

2022-ci ildə Rusiya Federasiyasının Ukraynaya qarşı müharibəsi başlayandan sonra Rusiya təbii qaz tədarükü üçün imzalanmış uzunmüddətli müqavilələrdə nəzərdə tutulan valyutalarda deyil, rublla yekun hesablaşmanı nəzərdə tutan iki mərhələli ödəniş prosedurunu tətbiq etdi. Bolqarıstan bunu etməkdən imtina etdi. “Azadlıq” radiosunun Bolqarıstan xidməti xatırladır ki, buna cavab olaraq Rusiya 2022-ci ilin aprelində qaz tədarükünü dayandırıb.

İtaliya, Fransa, Polşa və Finlandiya da daxil olmaqla bir sıra Avropa ölkələrindən şirkətlər tədarükün dayandırılması ilə əlaqədar artıq Qazprom-a qarşı arbitraj iddiaları qaldırıblar. Ötən ay Stokholm arbitraj məhkəməsi Qazprom Export ilə uzunmüddətli müqaviləni ləğv etmək və 13 milyard avro təzminat ödəmək hüququ qazanan Almaniyanın Uniper enerji konserninin xeyrinə qərar çıxarıb.

 

Nigar