Rusiya prezidenti Vladimir Putinin Türkiyəyə səfərinin konkret tarixləri iki dövlət başçısının köməkçiləri səviyyəsində razılaşdırılacaq.

Oxu24.com RİA "Novosti"yə istinadən xəbər verir ki, bu barədə Rusiya Federasiyası prezidentinin köməkçisi Yuri Uşakov məlumat verib.

O, jurnalistlərə Rusiya liderinin yaxın gələcəkdə Türkiyəyə səfərini gözləyə biləcəyi ilə bağlı suala cavabında deyib: “Konkret tarixləri öz səviyyəmizdə razılaşdıracağıq”.

İyulun 3-də Türkiyə prezidenti Rəcəb Tayyib Ərdoğan Astanada ŞƏT sammitində Putinlə görüşdə onu Türkiyəyə səfərə dəvət edib.

Türkiyə lideri rusiyalı həmkarı ilə söhbəti zamanı onu “tezliklə” Türkiyəyə gəlməyə çağırıb. Buna cavab olaraq Rusiya Federasiyasının rəhbəri Ərdoğanın dəvətini qəbul etdiyini və yaxın vaxtlarda Türkiyəyə səfər edəcəyini bildirib.

Bundan əvvəl Kremlin sözçüsü Dmitri Peskov Rusiya Federasiyası ilə Türkiyə arasında münasibətlərdə həll olunmamış problemlərin qaldığını, lakin hər iki ölkənin rəhbərliyinin onları həll etmək üçün siyasi iradəyə malik olduğunu bildirib.

Miri