Kaladze “xarici agentləri” hədələdi

Gürcüstanda qəbul edilmiş “Xarici təsirin şəffaflığı haqqında” qanuna uyğun olaraq təşkilatların reyestrdə qeydiyyatdan keçməkdən imtinası əmlakın müsadirə edilməsi və fəaliyyətlərinin dayandırılması ilə nəticələnəcək.

 

Oxu24.com xəbər verir ki, bunu hakim “Gürcü arzusu - Demokratik Gürcüstan” partiyasının baş katibi, Tbilisi meri Kaxa Kaladze deyib.

“Əgər təşkilatlar tələblərə əməl etməsələr, maliyyə cərimələri tətbiq olunacaq, sonra isə əmlaklarına həbs qoyulacaq. Onlar nə fəaliyyət göstərə, nə də vəsait ala biləcəklər. Əgər həqiqətən də yaxşı iş görürlərsə və pis niyyətləri yoxdursa, bəyannamə doldurub maliyyə göstərməyin nə problemi var? Lakin belə bir şübhə var ki, qütbləşmə, inqilabi ssenarilərin maliyyələşdirilməsi - bütün bunlar şəffaflığın olmaması səbəbindən baş verib”, - Kaladze jurnalistlərə bildirib.

 

O, həmçinin qeyd edib ki, Gürcüstana qarşı sanksiyalar gözləmir.

 

“Mən heç kimin sanksiyaya məruz qalacağını gözləmirəm, çünki biz sanksiyalara məruz qalacaq heç nə etməmişik. Öz ölkəsində qanun qəbul edən və ölkə əhalisinin əksəriyyəti onlara hüquq verən insanlara qarşı necə sanksiyalar tətbiq edə bilərsiniz? Bu, sadəcə olaraq inanılmazdır”, - deyə Tbilisi meri əlavə edib.

 

Miri